«Строитель» кевытыште

Мыят кӱлеш арвер-влакын спискым возышымат, Коян поселкыш «Строитель» кевытыш вашкышым. 

Кевытыш миен пурышым. Иктат уке. Лапкызе складыште шогылтеш. Чыла ончыштеш. Вара пӱкеныш миен шинче.

- Салам лийже, ӱдырем! Нойышыч? - ыштальым.

- Ой, пурымыдам шым уж, вуеш ида нал, - пелештыш. Кынелын, мый декем вашка.

- Ӱдырем, - манам, - мылам тиде, тиде да тиде кӱлеш.

Ожсо мут дене каласаш гын, прикащик мылам кӱлеш арверым касса деке пога. Кумыл сай. Мо мылам кӱлеш, чыла уло! «Лепота». Прикащик вате налшаш арверемын акшым шотлаш пиже. 

Тиде жапыште кевытыш ик палымем (шке ийготанем), татар пӧръеҥ, толын пурыш. 

Пурыш да саламлалт пелештыш. Ала шоҥгемаш тӱҥалынам, ала мо, но мыйын пылышлан тыге шоктен кодо (Пенсий ийготым вич ийлан кӱзыктышт, но вет тазалыкым нигӧ ик граммымат ок пу, йолташ-влак):

- Самец ме сыз?

Эхей, мый вет татар йылмым изиш гына палем, а рушлажым школышто Мишкан район Маевка ялын ӱдыржӧ Антонида Мухаяровна пеш сай туныктен ыле. Нигӧ ондален ок керт марий рвезым!

- Да, да, «самец», - ышталам.

Саде татарет: 

- Шым умыло: могай «самец»?

- Вара кызыт гына «Самец» ме сыз?» манын йодында ыле вет. 

Умбакыже прикащик вате деке ончыктен ойлем:

- А тиде вате «самка» лиеш…

Лапкызе йошкарген, вожылын пелештыш: 

- Я не «самка», я женщина…

- Палем, те ӱдырамаш улыда. Самырык, мотор, сӧрал ӱдырамаш… А тиде «павай» тидым пеш ок умыло. Тудо тольык «самец» да «самка»-влакым гына пала. Тиде вет чын, ӱдырем! Мый дечем «самец» ме сыз, - манын йодеш.  Витне, тиде шинчаже уремеш кодын (Чот волгыдо гыч пӧлемыш пурымеке, чыла пычкемыш коеш, садлан ожно «Шинчаже уремеш кодын» маныт ыле.). Садлан кевытыштыда лампычкыдам яра жапыштыда волгыдыраклан вашталтыза-ян, пожалыста, - рушла маньым. 

Налме арверлан акшым тӱлышымат, пакетышкем оптен, кевыт гыч лектын каяш погынышым.

Лапкызе вате саде йолташемлан пелешта:  

- А те, чӱчӱ, мом налнеда ыле?

- Эх, мондышым. Чыла мондышым. Тиде чоя марийым колыштымат, чыла вуем гыч лектын кайыш. Чу, мом налнем ыле? Мом налнем ыле? (Ик витриным шымла, весым…) Йӧра, уремыш лектын, машинашкем шинчам, можыч, шарналтем. Вара угыч пурем, - ыштале. 

Да почешем кевыт гыч лектын кайыш.

Мораль, йолташ-влак, тыгай: кевытыш мийымыда годым мом налшашым кагазеш возыза. Мыйын гай мыскараче-влак вуйдам ынышт аҥыртаре!