Чывыжат полша

Шоҥго изиш шонен шогышат, шаньыкеш терысым нале, но кудалтен колтен ыш керт - пурла пулышыжо чот коржаш тӱҥале. Мом ышташат ӧрӧ. Йол воктенже чумыргышо чыве-влак мландым удыркалаш пижыч. Кугызай, коржшо кидшым ужга кӱсеныш чыкалтышат, тушто эше телымак шорык пача-влакым пукшаш пыштыме кинде курикам вереште. Тудым, тыгыдемден, чыве-влаклан шолыш. Ончыч агытан лишеме, чыве-влакымат ӱжӧ. Удырен-удырен, кинде пудыргым чӱҥгаш тӱҥальыч. Кинде пудырго терыс ораш верештынат, чыве-влак тудым вашке гына шалатышт. Ора-влакшат изорва дене кышкымылан кӧра кугу огытыл, чара верыште пеле кошкенат шуыныт. 

Васли кугыза чывыже-влакым ятыр жап ончен шогышат, вуйышкыжо ик оҥай шонымаш пурыш. Пакча гыч мӧҥгыжӧ ошкыльо, тар шӱрашым кондыш. Ватыже  чывиге-влакым эре тар шӱрашым пукшен кушта, сандене чыве-влак тудым пешак йӧратат. 

Васли вес терыс орашке тар шӱрашым шавалтыш. Чыве-влак тидым ужыч да йӧратыме шӱрашыштым терысым удырен-удырен чӱҥгаш тӱҥальыч. Терыс ора шаланыш, иземе. Озашт нунын пашаштым куанен ончен шогыш. Шӱраш шагал кодмек, ватыжым кевытыш колтыш. Васли вате шӱрашым налын кондыш да марийжын терыс ора-влакым шалатымыжым ончаш лекте. Марийжын яра шогымыжым ужын ӧрӧ:

- Васли, шаньыкет кушто? Чыве-влакым пакча гыч поктен лукташ кӱлеш, кеҥежым чонеш витараш, йыраҥ-влакым шалаташ тӱҥалыт вет.

- Шаньык огешат кӱл. Ончо, мыланем чыве-влак полшат. Мый терыс ораш тар шӱрашым шавалтем, да чыве-влак, тудым чӱҥгышыштла, терысымат шалатат.

- Айда, йомакым ойлет!

- Тӱткынрак ончал. Нуно пеле кошкышо терыс орам вашке гына шалатен шолат. Тӱвӧ, кок оражым ужат?

- А кушто терыс орат? Чынак шалатеныт мо? 

- Вашке гына шалатышт, - вашештыш Васли.

- Чыве-влак терысым шалаташат полшен кертыт улмаш. Мый тар шӱрашым шагал нальым, тачыланат огеш сите дыр. Уэш кевытыш каяш логалеш. А чывына-влак, пареҥге шындымек, пакча гыч лекташ огыт мондо? - озавате пуштыланен йодо.

- Кудывечеш шӱрашым изиш шавалтет гын, эре тыйым вучаш тӱҥалыт, пакча нерген мондат, - воштылал пелештыш Васли кугыза.

Васлин пел пашаже ышталте, ойгыжат иземе, терысым удыркалыше чыве-влакым ласкан ончале. Ватыж дене коктын нуным кужу жап эскерен шогыштат, мӧҥгӧ ошкыльыч, чыве-влакат почешышт куржыч. 

Оза-влак куралшаш мландыштым ятырлан иземденытат, пакчасе чыла сомылым шке ышташ тыршат. Вольыкыштат ик каза да кок шорык пача веле, садлан терысат пеш шукак огыл. Пареҥге шындаш да лукташ икшывышт толын каят.

Тыгеат лиеш улмаш. Чыве-влак дене терысым шалатымаш Васлин омешыжат кончен огыл.