Тошто Мыскара кече

Тидым пален, Вася шаяраш шонен пыштен (таче вет, тошто стиль дене гынат, Мыскара кече). Тиде жапыште котельныйыш Сану толын пура. 

- Сану, Камыр-батыр тольо (Ялыште Сергейым тыге маныт ыле), сӧсна шӱшкылаш ӱжын кайыш, - манеш Вася.

- Йӧра, тошто вургемым чиемат, кӱлеш ӱзгарым налын мием.

Сану, мӧҥгыжӧ каен, вес вургемым чиен лектеш. Камырын капкажым пурышаш годым Мичу кычкыралеш: 

- Сану, куш кает?

- Камырын сӧснажым шӱшкылаш.

- Ит кошт. Ме сӧснажым ончыгечак шылыш савырышна. Кӧ каласыш?

- Вася.

- Тудо тыйым ондален.

Сану тидлан пеш чот сыра. Мичу дене пырля котельныйыш пурат. 

- Сану, таче тошто дене - икымше апрель, - воштыл пелешта Вася. 

- Ы-ы-ых!

- Йӧра, ит сыре. Тыгай кечын шояклымылан огыт сыре. 

Тиде жапыште Вася амбулаторийыш уколым ыштыкташ коштын, кылмен улмаш. Шке олмешыже Санум коден, укол налаш каен. Мичу ден Сану Васям ондалаш шонен пыштат. Мичун вуйыш ик оҥай шонымаш толын пура - Васян аракажым йӱаш. 

- Сану, Васян вате Ану дек коштын тол. «Лесник Ильдар тольо, литр аракам йодеш. Вася колтыш» ман. 

Вася шукерте огыл у пӧртыш илаш лектын. Ильдарлан парымже кодын улмаш. Сану Ану дек мият, мо лиймым ойла. Ану кӱварйымач литр аракам луктеш, закускылан коя ден киндым кучыкта. 

Вася укол гыч толмеш, пӧръеҥ-влак ик чарка дене колтат. Вася толмек, пырля эше икте дене нӧлталыт, киндым, коям пурлыт.

- Мемнан арака гайракак, - манеш Вася. 

- Палышыч мо? - ышталеш Сану. - Тиде ондалыметлан мемнан вашмутна. Таче ондалымылан огыт сыре вет!

- Йӧра. Шке пыштыза. Мый огым - вахта. 

Тыге, икте-весыштым ондален, тошто Мыскара кечым вашлийыныт. 

Варажым, конешне, Васялан Ану деч логалын. Но тидыже йӧршеш вес шомак.