Китай уна

- Ӱдырем, кынел, тый декет пеш кугу паша уло. Тый тыгодсо арвер-влак дене моштен кучедалат, мыланем ик поро пашам ыштен пу але, - шыргыжал пелештыш.

Мый Олина ковайым пеш палем, тудын кеч-могай пашажат эре воштылчыкым луктеш. Могай сомыл дене толмыжым йодынат шым шукто, чылажымат шкеак радамлен пуыш.

- Теве, - манеш, - теҥгече кастене саде мотор рвезын - Диман - «Тупела тӱня» программыжым ончышым. Тушто китай-влакым ончыктышт. Нуно йошкар таракан-влакым лӱмын ончен куштат да рестораныш пуат, тушто пеш тамле кочкышым ыштен кочкыт. Садлан мыят ик китай рвезым кеҥеж гочлан унала ӱжаш шонен пыштышым. А мо, кеҥежым ялыште пӱртӱс мотор, юж яндар, кочкаш таракан пӧрт тич темын - нигузеат пытарен ом керт. Тек толын илен кая, ала тараканемым шагалемда, да пӧртыштат полышкалыше арта. Ик тылзе мый денем ила гын, кокымшыжлан Матрана коват дек колтем - тудат коля пошымылан вуйым шийын шога ыле. «А китай калык, - ойлыш саде передачыштыже Дима, - мо гына тарванылеш, чылажымат кочкеш». Мыланна китай рвезе пеш пайда лиеш ыле.

Олина кова шонен пыштен гын, тудым шонымашыж деч кораҥдаш неле. Осал пашам ыштен ынже кышке манын, мыйже тыге ойлен тӧчышым:

- Ковай, кызыт вет граница петыралтын, черлан кӧра нигӧм огыт лук, нигӧм огыт пурто.

А пошкудо коваем йӱдыген ыш шого, кидым веле лупшале:

- Нефтекамск олаштат шукын улыт, тиде арнян коштын толам теве, унала ӱжын ончем, ала чынак пайда лиеш.

Пошкудо Олина кован вучыдымо унаже-влак огыт кой гын манын, ятыр жап эскерышым. Кеҥеж эртыш - уна-влак ышт кой.