Ӱдырамашым колышт - шкендыным ыште

Эх, машина! Ойлат вет, кӧн машинаже уло, ужалаш шона, кӧн уке гын, кузат налнеже. Кӱсенже «рожын» гын, кредитлан ӱшана, но, у ма, тошто ма, пӧрт ончылно але кудывечыште машина шогышаш. Ватым, йоча-влакым шынден, оньыкува дек але олаш миен толмак мом шога!

Теве Микивыр Йӱдвел кундемыш вахте йӧн дене пашаш коштеш. Шке ойлымыж почеш, окса шотышто огеш ойгыро, буровойышто ик трубам скважиныш волтымыжлан 100 теҥгем тӱлат. Но ала-молан водитель удостоверенийым пеш кужаш «ыштыш». «В» категориян документын кӱсеныш кузе пурен вочмыжо гын - «военный тайне».

Микивыр ден ватыже олаште тӱрлӧ салонышто машинам ончен коштыч. Тудлан «иномарке» кӱлеш, пашаште «Могай машинам нальыч?» йодыт гын, кугешнен, «иномарке» манаш лийже. А вот ватыжлан, йошкар тӱсан лиеш гын, «Калина-малинат» йӧра веле. Ӱдырамаш дене, эше вате дене ӱчашаш ит код - лучо вигак ойжым колышт. Мучашлан ватылан келшыше машинам муыч. Тудо, омсажым почын, шичме олмыш лоп верланыш - поролон мелна гай лаптыргыш.

- Тиде машина мылам пеш келша, налына веле. Адакшым «иномаркым» кучаш путырак шерге, а мемнан элыным шке ачален от керт гын, пошкудым йодына. Тудо чыла мошта. Йодат гын, яраланак олмыктен пуа, тый вахтыште улмо годым южгунам… Ой, мом ойлыштам, - йошкарген, умшажым кидше дене петырен шындыш.

Ура! Машина капка ончылно. Шуматкече толын шуо.

- Микивыр, айда оласе пазарыш миен толына, - темла ватыже.

- Йӧра, машинам веле ончалам, - пелашыже орава-влакым чумкален налеш, капотым почын, «дворниклан» вӱдым пышта, сигналым темдалеш, фара-влакым текшыра. У машина уак, чылажат сайын пашам ышта. - Шич, олаш кудалына, - пелешта Микивыр.

Илышыште правам налме гына огешат сите, вет опыт манметым оксала налаш огеш лий, тудо шке олян-олян погына. Теве ола, «Южный» вокзал, пазар. Микивыр машинам стоянкеш кодынеже, тидлан 10 теҥгем веле тӱлыман, а ватыже «Могай стоянке, корно воктеран кодена» манеш.

Машинам корно воктенсе тополь йымалан шогалтен, вес машинаште шинчыше мемнан ял рвезе-влакым ужде, еш дене пазарыш ошкылыт. Микивыр - весела еҥ, шаярашат уста. Но тиде гана рвезе-шамыч мыскарам ышташ шонен пыштат. Бардачокышто кагазым кычал ончат, но могай машинаште тыгайжым муат? Туге, нунат кагазым огыт верешт. Ик йолташыштым воктенсе буфетыш сераш лийшашлык могай-гынат кагаз лаштыкым йодаш колтат. «Тыште могай кагаз? На теве чай коробка», - манеш буфетыште ужалыше.

Рвезе-влак, машинаш пурен шинчын, «стоянка на неположенном месте» келшыше нарушенийым муын, пеш шучко «протоколым» серат. Тушан тӱжем теҥге штрафым тӱлаш кӱлмӧ, жапыштыже тӱлыдымӧ еҥ-влакым могай административный наказаний вучымо нерген шижтарат. Ӱлныракше числам ончыктат да «Госавтоинспектор Шуткин» манын возен шындат. Корно воктене Микивырын машинажым муын, «протоколым» «дворник» йымак пижыктен кодат. Шонеда, тидын дене историй пыта? Э-э, уке шол, умбакыжат шуйна. Рвезе-влак ялыш Микивырын пошкудыж дек йыҥгыртат да, кузежым-можым умылтарен, изирак инструктажым пуат.

Пошкудыжат «не промах» улмаш. Уремыште Микивырын толмыжым вучен шукта. Ужеш, Микивыр пеш каньысырлана, но моланжым йодаш огеш тошт, шке ойлаш тӱҥалмыжым вуча. Чынак, чыла кунам-гынат икымше гана лиеш, кӧ ужын, протокол манмет могай лиеш?

Микивыр шкеак ойлаш тӱҥалеш: «Олашке миен толна, чыла сай лиеш ыле, но ватылан верч протоколым кондышым, ынде штрафым тӱлыман. Тудым ом колышт гын, нимогай протоколат огеш лий ыле. Чыным ойлат улмаш: ӱдырамашым колышт - шкендыным ыште». Пошкудат изишак тулыш ӱйым шӱралта: «Тыланет ГИБДД гыч квитанцийым колтат, Сберкассыш миен тӱлет. Пагытыштыже от тӱлӧ гын, 15 суткалан налын каят, тушто, пуракым нӧлтен, полиций оралтым ӱштын коштат».

Микивыр икымше гана тыгай ситуацийыш логалын. Ынде правилым пудыртымылан квитанцийым кондымым вучаш тӱҥале. Почтальон почтым шалатен коштмо деч вара вигак яшлыкшым терга, газет-влакым почкен-почкен, квитанцийым кычалеш. А тудыжым огыт кондо, ГИБДД-ште монденыт гын веле?

Вашке гыч вахтышке каяшат жап шуэш. Ик кастене теҥгылыште кӱтӱм вучен шинчымыж годым пошкудыжо лишемеш.

- Микивыр, штрафетым тӱлышыч вара? - йодеш.

- Уке.

- Микивыр, рвезе-влак, олаш мийымет годым машинашт воктеч нуным ужде эртен каендат, мыскарам ыштеныт вет. Ну, шоналте, кӧ чай коробкаш протоколым воза?

- А тый кушеч палет?

- Э-э, кызытсе жапыште кажне еҥын мобильный телефонжо уло, рвезе-влак кузе тыйым изишак вуйдорыкым пудыраташ туныктымыштым йыҥгыртен ойлышт.

- Ватем туштак «Кӧ протоколым коробкаш серкала» мане шол. А мый ватылан шыдешкенам ылят, мутшым шым колышт. Вот окмак, - малдышат, шкежат воштыл колтыш, - тыгодсо рвезе-влак кертыт!

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».