Чапле выньык

Илыш ик вере ок шого, памаш гай шолеш: вашкена, куржына, мо-гынат лиеда. Шыжым теле, телым шошо алмашта. Пӱртӱсат шкенжыным ыштенак ышта. Пӱртӱс дене пырля илышнат ончыко кая.

Шошат толын шуо. Телым кӱжгӧ ош одеял йымалне каныше кушкыл, мотор шокшо игечылан куанен, мемнан чоннам куандарен, мландым ужар тӱс дене леведеш. Икмардан ошкылын, шошо паша-влакат лишемыт. Теве пошкудо Сакева акаят пакчажым куралыктен. Индешымше майлан ола гыч Анна ӱдыржӧ ден Олег веҥыжым пареҥге шындаш вуча. Пеш тургыжлана. Толмыштым палаш манын, ӱдыржылан йыҥгырта. Тудыжын «Авай, вучо» манме мутшо чотак куандара, вет ава эре икшывыжым вучен ила.

Ӱдыр-веҥе, толын шуын, чайым подылын, пакчаш пареҥге шындаш лектыт. Кечыже пеш мотор. Сад-пакчасе мӱкш-влак, вуй ӱмбалне мызлен, эн ончыч пеледше пеледышыш нектарлан, шыркалан чоҥештылыт. Изишак лӱдыктат, но чыташ перна. Нунат, векат, теле мучко кӱвар йымалне шинчымылан кӧра помыжалтше пӱртӱслан куаненыт.

Палемдыме паша-влакым шуктен, мончаш олтат.

- Аркадий, нигушкат ит кай. Мончаш пурена, выньык дене чот гына лупшена! Пошкудо Андрейымат каласе, - манеш Олег ватыжын шольыжлан.

- Йӧра-йӧра, пурена. Монча кыйык гыч выньыкым волтен, ямдыленак кодем, - манеш Аркадий. «Ну, тугеже, мый тылат таче ончыктем, - шыргыжалеш семынже да выньыкын икмыняр воштырешыже кӱртньывоштырым пӱтырал шында. - Мыйым выньык дене лупшымет годым эре «От керт, слабак!» манат ыле. Таче ончена, кӧ слабак».

Шошым монча телымсе деч вашкерак шуэш. Аркадий пошкудо Андрейым ӱжын толешат, коктын вигак мончаш ошкылыт. Почешышт курскажат мия. Кум пӧръеҥ мончаш кая гын, тиде - ик кыдежан, кум сӱретан комедий. Тӱрлӧ еҥ тӱрлын койышлана, кажныже шке семынже артист: икте моктана, весе «Кертам!» манеш.

Аркадийын курскажат, мый шокшым йӧратем манын, олымбак кӱзен возеш.

Аркадий, монча ончыч выньыкым налын пурен, вӱдыш лывыжташ пышта. Вара ик корка шокшо вӱдым налешат, «Курскай лӱмеш шокшым пу» манын, кӱ ӱмбак кышкалеш. «Курскайын могай осалже, черже, шинча вочмыжо уло, чыла шокшо выньык дене когартен луктын колтем. Коштмаштет корнан, таза лий», - ойлен-ойлен, курскажым выньык дене поньыжеш. Тудыжо, шокшылан куанен, олымбалне сӧсна семын шаланен кия. Выньык лышташ-влак, кугу мардеж годым пушеҥге гыч кӱрышталтын, кок велыш чоҥештылмыла веле койыт. Лышташ йогымо семын кӱртньывоштырат почылтеш. Курскаже лупшалме сайын я ик йолжым, я весыжым нӧлтал колта. Теве гына шаланен кийыше пӧръеҥ кумыж семын туртын возеш.

Аркадий, шокшым пуэн, адак чотрак кыра. Курскаже чытен ок керт, олымбач тӧрштен волен, монча ончык лектеш.

Тушто Андрей канен шинча.

- Олег веҥе, тупет мо лие? - йодеш. - Оньыкуватын узо комбыжо чӱҥгымӧ гай лийын пытеныс.

- Аркадий выньык дене поньыжо. Чытен кийышым, шымак пелеште. Тудым эре «Слабак!» манам ыле, таче шке вийдымыш лектым. Шокшыжлан чытемат ыле дыр, выньыклан чыташ ыш лий, - вашешта тудо.

Курскажын монча ончык каналташ лекмыж годым Аркадий, нигӧ нимом ынже шиж манын, кӱртньывоштырым пӱтырымӧ выньык воштырым олымбал йымак туген шола. Вара шкежат монча ончык канаш лектеш.

- Ну, курскай, кӧ слабак? - воштыл йодеш.

- Мутат уке, таче - мый…

Изображение mikkooja1977 с сайта Pixabay

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».