Товар кучен моштышо пелаш кӱлеш

Мыйын акам шукертсек пелаш деч посна ила. «Молан шкетын илет, ынде йочат-влакат кугем пытенытыс» манмемлан кидым веле рӱзалта. «Порыжо еш дене ила, аламаже мылам ок кӱл» малдалеш коклан пӧрык, кунамже «Вара зӓр лектам ылят, нигӧат ок нал» манын воштыл пелешта. «Да адакшым шоналте, шӱжарем, - каласкалаш тӱҥале ик гана, - палыме пӧръеҥ-влак кокла гыч южышт товарымат, чӧгытымат кучен огыт мошто, кучымыштат огеш шу. Теве кодшо кечылаште автобус дене ола гыч пӧртылмем годым корно мучко аптыранен да воштыл тольым. Кок пӧръеҥ, ваш шинчын, пеш кутырат. Иктыже, маска гай кугу капан, пеш кӱжгӧ пӧръеҥ - кожлаш наҥгает гын, пила деч посна пушеҥгым сӱмыраш лиеш, а ваштареш шинчышыже тугай тале - имне деч посна пасум курал кертеш докан. Мутланымыштым колыштын, теве мом умылышым.

- Мый, - малдалеш саде маска гайже, - теҥгече у рецепт дене киярым шинчалтышым, тидым, тудым пыштышым.

- А тый помидорым тугай рецепт дене ыштен онченат? - йодеш весыже.

«Ну, - шонем, - илыш кайыш, пӧръеҥ-шамыч киярым, помидорым шинчалтат». Туран гына ончальым да шкемын остановкешем волен кодым.

Но вет илыш тугай паша - мом от уж да мом от кол. Ялем марте шуко ма, шагал ма йолын ошкылман, но, пиалешем, машина вереште. Руль воктен пеш мотор, чатката, кумылло илалшырак ӱдырамаш шинча. Мут гыч мут кайыш. Тудат илыш корныж нерген каласкалаш тӱҥале.

- Теве, - манеш, - мемнан маска лук ялыштына машина пеш кӱлешан: пум шупшыктет ма, шудылан кудал колтет ма. Теҥгече кожлаш пу пӱчкаш мийышымат, пилам пудыргыш, запчастьлан коштын толаш вереште. Свечаже йӱлен каен улмаш, алмашташ верештеш.

- Вара тугай паша дене шке кучедалат, пелашет ок полшо мо? - лыжган гына йодшын койым.

- Мемнан ялыште улыжат вич чын пӧръеҥ веле. Иктаж лу пырчыже - тыҥге-туҥге, молышт - ял сӱрет-влак. Адакшым чыла пӧръеҥ пашам шукыжо ӱдырамаш-шамыч ворандарат. Но тугат нунымат вурсаш ок лий. Нунын деч посна илаш йокрок: коклан пӧрык туманлашат нигӧ дене. Айда, шкендын пӧръеҥет лиеш гын, кеч, туманлен, чоным луштарет, - воштылал пелештыш да мыйым ялем лишан волтен кодыш.

Ужмем-колмем шукертсек шонен коштам. Вот вет илыш мыняр ончык каен. Пӧръеҥ-шамыч сурт сомылым тӧрлат, ӱдырамаш-влак пӧръеҥ пашам шке кидыш налыныт - пум, шудым ыштат, машинам тӧрлат, эше пашаш коштыт да икшывыштым куштат. Теве, шӱжарем, тыгайым ужмо-колмо деч вара шоҥгемме велеш пелашат ок кӱл, киярым да помидорым мый шкат шинчалтен моштем», - мутшым кошартыш.

Изображение oknesanofa с сайта Pixabay

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».