Коррида

Элымвай ешыж дене ялыште ила, моло пошкудыжо семын тӱрлӧ вольыкым ашна. Изи презыжым кум ияш, иктаж 450-500 килограмман ӱшкыжыш савырнымеш ончен куштен. Ӱшкыжат шке пашажым шуктен шоген, ялысе ушкал-влакым обижаен огыл.

Ик кечын оза ватыжлан тыгерак каласен:

- Ӱшкыжым шуко пукшышна, ончышна, ынде тудо мемнам пукшыжо. Шӱшкылаш пагыт шуын. Ӱдыр-шамычлан уверым колто - каныш кечылан толышт.

Каныш кечылан ӱдыр-веҥе-шамыч погынен толын шуыт. Пӧръеҥ-влак, вӱташ пурен, ӱшкыжым ончалытат, иктыже ойла:

- Ме шке гына тыгай «ората» дене нимат ыштен огына керт. Козбайым ӱжаш кӱлеш дыр.

- Ох-хо, Козбайлан пеллитр арака кӱлеш, эше мыланна кум гана шӱрӧ шолташ ситышашлык шӱшкылтышым пӱчкын наҥгая. Уке, туддеч поснат сеҥена, визытын улынас, - манеш весыже, кугу капан веҥыже - тудо шкежат саҥга гыч перен колта гын, кок кече уш деч посна киен кертат.

- Мом шуко шонаш, ӱшкыжын ныл йолжым пидаш да саҥгаж гыч чӧгыт дене пераш, да чыла - мом шонет, тудым ыште, - манеш кумшыжо.

Тугак ыштат. Нылымше веҥе ӱшкыжым вуйысо тӱкӧ коклаш чеслын гына чӧгыт дене перен колта. Тиде перымаш ӱшкыжлан пормо пурлмо гай гына лие чай: ышат аҥырге, ышат шуҥгалт. Но туге шыдешкыш, ой-ой, ындыжым Испанийысе коррида дечат оҥайрак сӱрет тӱҥале. Э-э, тидым Чапайысе коррида манман дыр.

Ӱшкыжын шинчаже вӱраҥе, шыдыж дене кандырам каток шӱртӧ семын кӱрышт пытарышат, чӧгыт дене перыше могырыш вуйжым савыралтен, мӱгыралтен, йолжо дене мландым удыралын тарваныш. Веҥе мариет, чӧгытшым кудалтен, пакча лукышто мотор снеге семын оптен шындыме изирак шудо каван могырыш туге писын куржо, мыйын шонымаште, кӱчык дистанцийыш куржшо тӱнямбал чемпион иктаж лу метрлан вараш кодеш ыле. Каван шеҥгек шылын шогалмек, утлышым, шоналтыш. А ӱшкыжет туге почешыже почшым нӧлтен кудал колтыш, шудо каваным кум секунд коклаште шалатыш. Иктаж 20 минут ончылтен саде веҥе мариет деч «Метрат пеле кӱкшытыш тӧрштен кертат мо?» манмылан вуйвичкыж воктен парняж дене пӱтырал ончыкта ыле дыр. А тыгай туткарыш логалмек, пече гоч йыве-йово веле койо, вес могырыштат лие, утлыш. Ӱшкыж, савырнен, пакча капка воктен умшам карен шогышо могырыш кудал колтыш, ындыжым оза кугыза шинчажлан перныш ала мо.

Шоҥгын шӱм-мокшыжо шиже чай, вашке гына пӧртышкыла «ӧпчам ӱйлыш» - реакций манмыже пеш сай улмаш. Шоҥгет, пӧртӧнчык кӱзен, омсам почын-петырен веле шуктыш, руш манмыла, «пу зодчество шедевретым» ӱшкыж шалатенат пыштыш. Коча деч ончыч кудывечыш да тушечын вӱтасе ӱшкыж шогымо пӧлемыш пурен шогалше веҥе-влак гыч иктыже «Ойлышым вет, Козбайым ӱжаш кӱлеш ыле, тудын деч посна ме ӱшкыжым шӱшкылын огына керт» мане.

Козбай дек делегатым колтышт. Тудыжо толят, берданка пычалже дене шыдешкыше, орышо ӱшкыжын вуйышкыжо лӱен колтыш. Тыгеракын ӱшкыжым шыл ораш савырышт. Эрлашыжым веҥе-шамыч шылым нумалын пӧртыл кайышт. Шоҥгылан вуйгоҥгыра, коваште да изишак шыл кодо. А теве Козбай, чынак, пашажлан пеллитр кӱмышкам йодо. Наҥгайыме шӱшкылтыш шылже кок кечылан кочкаш ситен. Чапайыште коррида кузе мучашлалтме нерген калык кужу жап ойлен.

Изображение Laurent DOUSSOT с сайта Pixabay

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».