Кӧ ош вургем дене коштеш?

Мыняр кужаш илет, тунар илышлан аптыранет. Ожно кажне кечылан, арнялан, идалыклан куанен иленна гын, кызыт кажне кечын, кидым кок велыш рӱзалтен, эрдым пералташ да «Ой-ой, кушко каена да кушко илен шуына» манаш веле кодеш. Теве адак ала-могай чер толын лектын, да тугай лӱмым пуэныт - коронымак чиктеныт мо, пуйто кугыжа улеш.

Ме, ялысе шоҥго-влак, тидым огына шиж, сурт кокласе сомылым виктараш садак кудывечыш лектын коштына. А олаште илыше мемнан ийготан ковай-кочай-влак пеш лектын огыт керт, пачерыштышт телевизор манме яшлыкыштым «кӱтен шинчат». А туштыжо эреак саде лӱдыкшӧ чер нерген гына ойлат.

Мыйын йолташ коваемат шукертсек уремыште ок кой. Мый тудым ужымат, нимогай азап лийын огыл дыр манын, суртышкыжо ошкыл колтышым. Нигунам капкажымат тӱкылыдымӧ Матрана кокам кугу кӧгӧнымак сакен шынден. Но, мыйын мийымым ужын, капкам почо. Пӧртышкыжӧ ӱжын пуртыш да молан тӱкылалт шинчымыж нерген каласкалаш тӱҥале.

- Теве, - манеш, - телевизорым чӱктышым, а тушто лӱдыкшӧ чер нерген ойлат. Нигушкат ида лек, нигӧмат ида пурто, маныт. Садлан мыят тӱкылалт шинчем. Ик кечын лӱдыкшӧ чер могай лийын кертме нерген шонкален гына шинчем ыле, саде чер мыйын суртыш тӱкалымым ужым (Юмылан тау, капкам тӱкыленам ыле). Вуй гыч йол марте чыла ошым чиен, шинчажым очки дене петырен, пеш кужун коеш. Капкам тӱпкыш-тӱпкыш, ала-мом кычкыренат тӧчыш, но мый шым поч, шып гына окна чарша шеҥгеч эскерен шогышым. Вара садет Олина кува деке пурыш. «Ну, - шонем, - Олина, тиде чер тыйым пӱтыралеш, капкатымат тӱкылен отылыс, окмак». Умбакыжат эскерем ыле, Олинан пӧрт воктенсе пушеҥге мешайыш. Ик пагыт гыч Олина мыйын суртем велыш куржмо гыч койо. «Уке, омак пурто, черым шалатен ынже кошт», - шоналтышым. Тӱкалыш, кычкырыш - шым пурто. Тулеч вара капкамым, пӧртемым эше чотрак тӱкылен шындышым, но вет ойгыжо тушто - тиде тылзын пенсием шым нал. Саде коронат корнышто солалтен, витне.

- Саде ошым чийышет пенсий шалатыше ӱдыр лийын вет, а тый пуртен отыл. Пенсиетым вес тылзын налат ынде, - манам.

Матрана ковай эшеат чотрак аптыраныш.

- А мо, - манеш, - пенсий шалатыше ӱдырнам туге петырен пытареныт. Саде чер чынак тугай лӱдыкшӧ мо? Мыланнат уремыш чиен лекташ ик пенсий дене тугай вургемым налаш кӱлеш докан. Чу, - малдале вара, - мыйын Миклаемын ожно мераҥ кучаш куржталме ош вургемже уло, пӧрткокла гыч волташ верештеш.

Матрана ковайлан кужу жап чылажымат умыландараш тыршышым, но тудо тугак, кок кидшым рӱзен, «Ой, лӱдыкшӧ! Ой, лӱдыкшӧ!» малден шогылто. Но тулеч вара капкажым тӱкылымым чарныш, коклан уремыштат кояш тӱҥале.

Изображение Pexels с сайта Pixabay

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».