Салам алейкум

Йолташ-влак, иктаж гана самырык-влакын кузе саламлалтмыштым шекланенда мо? А вет южгунам пеш оҥай шомак-влакым колаш леш. Мемнан самырыкна годым чыланат «Привет» малдат ыле. Кызытат тугак дыр… Южышт англичанла «Hi» маныт, «Йӧра» мутым «Ок» дене вашталтеныт. А теве эртыше курымын 70-ше ийлаштыже Ардаш ялыште илыше самырык-влак татарла саламлалташ кумылаҥыныт улмаш. Икте-весышт дене вашлийме годым «Салам алейкум» малденыт, а вашеш «Алейкум салам» шоктен.

Тиде авамын 7-ше але 8-ше классыште тунеммыж годым лийын. Ямле шошо кечын аваж ден ачаже мончаш олтеныт. Тунам кызытсе гай шке семын илен огытыл, пошкудо дек пурен лектеденыт, икте-весе деке мончаш мушкылташ коштыныт.

Авам, оралтыште сомылжым пытаренат, пӧртыш пурен. Меҥсыле ковам тудым мончаш колтен, а тушто кокаже-влак мушкылтыныт. Ожно шуко еҥже мончам эҥер воктене чоҥен. Ковам-кочамын мончаштат ӱлнӧ, пакча мучаште, лийын.

Авам, шошо кечын пӱртӱс иланымылан, кайык-влак мурымылан, каныш кече лишеммылан куанен, весела кумыл дене мончаш куржын колтен. Омсам почын, «Салам алейкум!» манын, кокаже-влак дене йӱкын саламлалтын. Ваш мутланен, ласкан мончаш пурышет-влак чурик лийыныт, авамын мом каласымыжым сайын колын шуктен огытыл. Парсуло кокаже «Мом манат? Малек толеш?» манын да монча гыч куржынат лектын, Изикай кувай - почешыже… Тыманмеш кашта гыч вургемыштым руалткален чияш тӱҥалыныт. «Уке, «Малек толеш» шым ман, «Салам алейкум» манын, татарла саламлалтым», - умылтарен авам. Парсуло кувайын пошкудыштыжо Малек илен улмаш, чын лӱмжым ом шарне, но ял калык тудым тыге лӱмден. Мончаштыже, конешне, чыланат сайын мушкылт лектыныт, а оҥай шарнымаш таче мартеат кодын.

Мом мый каласынем, йолташ-влак? Тунемза шочмо йылмым, тунемза йот йылмымат, уке гын монча гычат лӱдын куржаш лиеш.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».