Все новости
ЛУДШО-ВЛАКЫН МЫСКАРАШТ
21 Сентябрьыште 2019, 10:37

Мокмырым шӧреныт

1990-ше ийыште кевытлаште кочывӱд пеш чотан ыле. Конденыт гынат, талон дене гына пуэденыт. Кӱлеш ма, уке ма - налаш верештын, вет кеч-могай сомылым ворандарымаште саде «валюта» ончыч коштын.

Васлий ден Алексей, фермыште пашам ыштыше йыгыре пошкудо-влак, ик кечын кечывал жапыште вольык эмлызын пӧлемышкыже каналташ пурен шинчыныт. Ӱстембалне тич темыме «Вермут» кленчам ужыныт. Арака манын шоналтеныт да, ӱпшыч ончыдеак, стаканеш темен, йӱын пытареныт да лектын чошеныт. А тушто черемичный вӱд - вольык ӱмбалне тий пытарыме эм - улмаш. Тудым спирт дене йӧрымылан кӧра йошкар арака тӱсан лийын. Мокмыран пӧръеҥ-влак тидым шижынат огытыл.
Лаемыр, вольык эмлызе, пӧлемыш пурен шогалынат, кок стаканым да яра кленчам ужын, вигак мо лиймым умылен. Э-э-э, садак толын пурат эше, тунам кӧжым пален налам, шоналтен.
А Васлий ден Алексей «кугыжан йолын коштмо вер» гычат лектын огытыл - мӱшкырым чот пӱтырен, укшинчыктен. Пакчаште туалетыштат ваштареш улмаш. Тушеч икте-весыштлан кычкыреныт: «Колена вет! Мом йӱынна?»
Эрлашыжым коктынат пашашке пыкше миеныт. А Лаемырет кӧ осалым ыштылмым вигак шижын. «Йӧра эше колен огыдал, утленда! Тетла, йодде, тыгай пашам ида ыштыл!» - шылтален каласен.
Тулеч вара Васлий ден Алексей кужу жап кочывӱдым умшашкат налын огытыл. Кӧргышт эрнен, мокмыр эртен. Саде яра кленчам ужмо сайын ӱпышт копыж шогалын. Теве вет, илышыште моат огеш лий. Мыскара йӧре шарналташ веле кодеш.


Читайте нас: