Владимир Путин вияш эфирыште мо нерген ойлен

Башкортостаным кум гана ушештарышт

Эфир годым Башкортостан гыч пуымо кум йодышым да обращенийым йоҥгалтарышт. Тӱҥалтыште вӱдышӧ Екатерина Березовская Белорецкыште илыше Людмила Орлова нерген каласкалыш. Кодший тудын эргыже СВО-што вуйжым пыштен, колымекыже, тудым «За отвагу» медаль дене наградитленыт, но Людмилалан медальым нигузе кучыктен кертын огытыл. Ӱдырамашын Вияш линийыш йодмаш дене лекмекыже, оборонный ведомство писын гына ты йодышым решатлен. 

Вара президент уло тӱня Башкортостаныште да Татарстаныште тӱрлӧ национальностян, религиян еҥ-влакын пырля илыме сай опытыштым эскерымым палемден. «Ме Россий Федерацийыште чыла традиционный религийлан, кузе полшенна, тугак полшаш шонена», - каласен Владимир Путин. 

Кумшо, «Башинформ» агентствын журналистше Ляйсан Закирова тӱнямбал вашкыл да Башкирийын Таджикистаныште индустриальный паркым ыштымыж нерген йодышым пуэн. «Кызыт Таджикистаныште россий-таджик индустриальный парк ышталтеш. Россий велым ты проектын операторжылан Башкирий шотлалтеш. Эше могай келшен илыме эллаште тыгай площадке-влакым ышташ шонымаш уло? Кушто эше Башкортостанын опытшо кӱлеш лийын кертеш?» - йодын тудо вуйлатыше деч. 

«Ме икмыняр ий годсек Египетыште, Нил велне, тыгайрак структурым ыштена. Тидыже Российланат, Египетланат кугу экономика лектышым пуышаш. Эше икмыняр партнёр кугыжаныш дене тыгайрак проектым илышыш шыҥдараш лиеш. Мутат уке, тендан опытдамат кучылтыт. Коктеланыде каласен кертам: Башкортостан виян технологический да промышленный базыж дене кӱлешан рольым модеш да ончыланже шындыме чыла цельыш шуэш. Федеральный правительство деч, кӱлеш гын, тыланда полшаш йодам», - вашештен Владимир Путин. 

Тыныслык да у спецопераций-влак нерген

Ме ты конфликтым, тӱҥ амалжым кораҥден, тынысле йӧн дене мучашлаш ямде улына. Курский областьым ВСУ деч утарыме деч вара стратегический инициатива пӱтынек Россий армий велыш куснен. 

Мемнан войскана-влак боевой тӱкнымаш линий мучко наступатлат, тений идалык мучашлан боецна-влакын у сеҥымашыштым ужына. Украиныште боевой действийлаште чылаже 700 тӱжем еҥ участвоватла. 

Ме темлыме компромисс дене келшена. Мече тичмашнек киев режим вуйлатыше да нунын Европысо спонсорышт велыште. Ме переговорлан да конфликтым тынысле йӧн дене мучашлаш ямде улына. Касвел Российым пагалаш да, НАТО-м эрвелыш шарыме дене ондалыме гай, мемнам ондалкалаш ок тӱҥал гын, у специальный военный операций ок лий. 

Телефон мошенник-влак нерген

Тӱрлӧ мерым ыштымылан кӧра преступлений 7, а эҥгекше 33 процентлан шагалемын. Тичмаш ончымаште чумыр лектыш сай, но мошенник-влак оксам кӱрын лукташ ончыкыжат мом-гынат уым шонен муыт. Сандене, тендан дене кеч-кӧ кеч-могай йӱк дене ойла гынат, окса да иктаж пого нерген мутым тарвата гын, вигак телефон дене кутырымым чарныза. А искусственный интеллектын йӧнжым шотыш налаш гын, тиде моткоч лӱдыкшӧ. 

Врач-влак нерген

Студент-медик-влакын обязательный отработкым эртышашышт, нуным иктаж олашке але вер-шӧрыш пашаш колтымо нерген мутым тарватыме огыл. Лач еҥын специальность дене кушто-гынат пашам ыштышашыж нерген ойлена. Педагогический вузлаште тунемше студент-влак шотышто тыгай йодышым тарватыме огыл, кызытеш кӱлешлыкшат уке, шонем. 

Налогым кугемдыме нерген

НДС-ым кугемдымын амалже - бюджетым балансироватлымаш. Тиде кагазеш возен шындымаште огыл, а бюджетыш парыш пурымо дене палдырнышаш. Тыге теневой экономика да налогым тӱлыдымаш деч ӱмылеш кодмо деч кораҥаш задачым шындыме. Тиде кугу задача. Эреак тыге кодеш мо? Конешне, уке. Тӱҥ цельже - ончыкыжым налог нелытым иземдымаш. Правительстват пашажым тыгай шонымаш дене виктараш тӱҥалеш. 

Экономика нерген

Федеральный бюджетын дефицитше - 2,6 процент. Но вес ийлан тудо 1,6 процент лиеш да кум ийыште 1,5 процент деч артык кодшаш огыл манын шонена. Тиде сай показатель, кугыжаныш парымнат пеш изи, виян экономика-влак коклаште эн ӱлыш. Тӱҥжӧ - правительство бюджетым балансироватлен кертын, тиде элын экономикыжын да финанс системыжын пеҥгыдылыкшым ончыктышо кӱлешан показатель. Тиде мемнан калык ончылно социальный обязательство дене кылдалтше йодышлам тичмашнек шуктен, национальный проект-влак кышкарыште вияҥме йодышлам решатлен, технологический вияҥмашын цельышкыже шуын да, мутат уке, Вооруженный Вийын йодмашыжым шуктен кертшашым ончыкта. 

Макс мессенджер нерген

Max мессенджерым ышташ кӱлеш ыле мо? Конешне, кӱлеш. Мемнан шкенан мессенджер деч молыжо чыла лийын. Россий - цифровой суверенитетан кум эл гыч иктыже: тиде Ушымо Штат-влак, Китай Калык Республик да ынде Россий. Max шотышто конкуренций эре кӱлеш, да мый ӱшанем, тудо эре лиеш. 

Кече режим нерген

Мый мыняр гыч мыняр шагат марте пашам ыштем... Паледа, мый пашамым пеш вараш пытаренам, а кызыт утыр варарак да варарак. Мыняр шагат мартежым ом ойло, сайын ок йоҥгалт, молан манаш гын тиде паша законым пудыртымаш, да тиде йоҥылыш. Жапыштыже малаш вочман, шкем формышто кучыман. Мыят чыла еҥымат тыгай режим дене илаш да пашам ышташ ӱжам. 

Локтызо-влакын рекламыштым чарыме нерген

Сатанизм, оккультный услуга, тӱрлӧ локтызо-влак да моло еҥ-влакым аҥыртылыт гына, ала-могай пычкемышыш поктен пуртат, граждан-влаклан, нунын моральный, психический, психологический состоянийыштлан кугу эҥгекым ыштат. Тидден кучедалман. Но тидым, айдемын праважым пудыртылде, утыжым шыгыремдылде, чаткан гына ыштыман. 

200 ий гыч элын ончыкылыкшо нерген

Элна келге шинчымашан, кӱкшӧ технологиян лиеш да технологий полшымо дене ончылныжо шогышо чыла задачым решатлаш, тыныс да сай илыш дене илаш тӱҥалеш манын ӱшанем.