Владимир Путин ден Радий Хабировын вашлиймашыштым эксперт-влак кузе акленыт?

Радий Хабиров СВО-што улшо-влаклан да нунын ешыштлан кузе полшымо, экономикым вияҥдыме, у предприятий, больница-влакым чоҥымо, тунемме заведений-влакым олмыктымо да моло нерген каласкален. Вашлиймаш мучаште Владимир Путин Башкортостаным вуйлатышын кокымшо сроклан сайлымашке ушнаш шонымыжым йӧплен. Тидын шотышто палыме политик, мер да духовный пашаеҥ-влак теве мом каласеныт.

«Хабиров вуйлатыше, айдеме, администратор семын да Москваште сай кылже улмылан кӧра республикылан шуко ешартыш йӧным ыштен. Тидым Кремльыштат, мер калыкат сайын палат. Садлан Хабировын тудым сайлыме шотышто коктеланышашыже уке, а президентын тидым ыштыдымашлан амалже уке», - каласен Региональный йодыш-влак институтын вуйлатышыже Дмитрий Журавлев.

«Радий Хабиров эл вуйлатышын командыжын ӱшанъеҥже улмым пеҥгыдемден. Эл президент регионым вуйлатыме ответственный  да кӱлешан пашаште шкеныштын ӱнарыштым ончыктышо-влаклан эҥерта», - манын кумдан чапланыше спортсмен, кучедалмаш дене кум гана олимпийский чемпион, сенатор Александр Карелин.

«Мый палем, кузе Хабиров пашаште «йӱла», кузе йӱдымат огеш мале, республикысе корныла дене йолын коштеш. Ужам, кузе калык тудым йӧрата. Пӱртӱсым жаплымыжым да палымыжымат палем. Мый тудын башкир-влакын йӱлашт да илыш радамышт нерген каласкалымыжым колышташ йӧратем. Тиде пеҥгыде нерван да пеҥгыде кидкучышан айдеме. Чын пӧръеҥ - шке мутшылан оза. Радий дене йолташ улмына дене кугешнем», - ойла элыште кумдан палыме журналист, Кугыжаныш Думын депутатше Тимофей Баженов.

«Мыйын шонымаште, Радий Фаритович СВО-лан полшымо темым сайын пала гына огыл, тиде тудын чонышкыжак шыҥен. Мемнан Шочмо элна дене мо гына кылдалтын, тудлан чылажат шерге. Тудо номенклатур тӧра гына огыл, грамотный вуйлык. Мутат уке, ыштыме пашам федеральный кӱкшытыштат ужыт. Садлан эл вуйлатыше Радий Хабировым кокымшо сроклан сайлаш темлыме ойым йӧплен», - каласен башкир батальон-влакын духовный наставникышт Виктор ача.

Башкирий президентын шӱдымыжым кузе шуктен

Владимир Путин губернатор-влак дене вашлиймыж годым регионышто паша кузе кайыме нерген докладым колыштмо дене гына огеш серлаге, лишыл жапыште могай сомылым шукташ кӱлмымат ойырен палемда. Кызыт Башкирийлан вашкеполыш службын врачше-влакын чотыштлан тӱткылыкым ойыраш шӱден. 

Эл вуйлатышын ончыч шӱдымыжӧ-влакым кузе шуктымымат рашемдышна.

1) Икшыве-влак шагалрак колат

2019 ийыште президент Башкирийыште икшыве-влак элысе кокла чот деч кок пачаш шукырак колымым палемден. Вичияшым иктешлымек, Владимир Путинлан каласеныт: ты показатель кок пачаш иземын. Тидым эше ава мӱшкырыштак, вара ик ийым темымешкышт, икшыве-влакын, мӱшкыран ӱдырамаш-влакын тазалыкыштым эскераш, кӱкшӧ технологиян оборудований дене диагностикым сайын эртараш лиймылан кӧра ыштен кертме.

2) Пашадыме-влак шагалемыныт

2019 ийыште президент республикыште пашадымылык 4,3 процентыш шумым палемден. 2023 ийым иктешлыме почеш ты цифр кок пачаш иземын да 2,3 процент гына кодын. Кызыт республикын ончылно кайыме отрасльлаштыже - промышленностьышто да агропромышленный комплексыште - пашаеҥ огеш сите. 

3) Экологий нерген шонат

Башкирийыште экологий паша ныл направлений дене шукталтеш. Тиде атмосферым шагалрак амыртымаш. Лавыртыме йогышо вӱд дене кылдалтше йодышым шотыш кондымаш. Несанкционированный шӱк ора-влакым пытарымаш, кызыт 3000 утлажым кораҥдыме. Тиде недр дене шотдымын пайдаланыше-влак дене кучедалмаш. Межведомственный комиссийын полшымыж дене шӧртньым шотдымын лукшо 13 компанийын лицензийжым поген налме. Икмыняр уголовный пашам тарватыме.

Россий Президент Владимир Путин Хабировын кокымшо сроклан сайлалташ шонымыжым йӧплымӧ нерген:

Радий Фаритович, чумыр ончымаште тендан пашада удан огыл ворана, пландат шуко, лектышат сай. Садлан мый тыланда полшаш тӱҥалам, а сайла, мутат уке, калык. Калык дене пашам ыштыман, поснак ты пагытыште - чӱчкыдынрак вашлийман, мутланыман, молан манаш гын паша пӧлем гыч гына чылажымат ужаш да колаш огеш лий. А тыге чумыр ончымаште чылажат сай, шонымашкыда шуаш тыланем.