Владимир Путин пресс-конференцийыште мо нерген ойлен?

Социальный илыш 

«Земский доктор» кугыжаныш программа почеш пеҥгыдемдыме «подъемный» оксам кӱзыктыман. Врач-влаклан тиде шийвундын кугытшо кок миллионыш, фельдшер-влаклан миллион теҥгеш шушаш. Тыгай ошкыл селалаште кадр йодышым саемдаш полшышаш. Здравоохраненийын первичный звеножлан мемнан модернизацийым ыштыме программына уло. Тиде сомыллан шагал огыл шийвундым кучылтына. Автомашинам, мутлан, 14 тӱжемым ойырышна. ФАП-влакым чоҥена, уэмдена. Тиде программа почеш ончыкыжат кӱлешан пашам шукташ тӱҥалына. Еш ипотека программымат шуйыман. Тушто тӱҥалтыш взнос кугу огыл - идалыклан 20 да 6 процент. Икшыве кумыт гын, 450 тӱжем теҥге субсидийым тӱлышаш улыт. Кочывӱдым йӱмӧ ваштареш кучедалмылан кӧра суррогат-влакым налше, кӱмышкам шолтышо, нунын дене аяргыше-влакын чотышт ешаралтын. Тӱнямбалне корь дене черланыше-влакын шукеммышт мигрант-влакын пашам ышташ толмо эллаште уда иммунизаций, тыгак Украинысе ситуаций дене кылдалтын. 

СВО да тыныслык нерген 

Тунам тыныслык толеш, кунам ме шындыме цельышкына шуына. Нуно вашталтын огытыл, тугаяк кодыныт: денацификаций, демилитаризаций да Украинын нейтральный статусшо. Тачысе кечылан мобилизацийын кӱлешлыкше уке. Ме чумыржо 400 тӱжем доброволецым чумыраш шонышна, а погыныш 486 тӱжем. Тыгодым шочмо элым аралаш кумылан пӧръеҥ-влакын чотышт ок шагалем. 

Кидыш саркуралым налын, Российын интересше верч кучедалше-влак чылан икгай условийыште лийшаш да кугыжаныш деч икгай полышым налшаш улыт.

СВО гыч тыныс илышыш пӧртылшӧ сарзе-влак школлаште йоча, вуеш шудымо икшыве-влак денат пашам ыштат. Самырык тукымым патриотизм шӱлышеш куштымаш - тиде моткоч кӱлешан сомыл. 

Российын кечывалвел ужашыштыже аэропорт-влакым почаш шонымаш пассажир-влакын лӱдыкшыдымылыкышт шотышто йодыш дене чак кылдалтын. Оборона министерство, тидым рашемден лончылымеке, келшыше пунчалым луктеш. Чыла сай лиеш гын, мылам увертарат да пашам шукташ тӱҥалына. 

Европын ятыр олалаштыже да тӱнян моло кундемлаштыже, Америкысе Ушымо штатлаштат ятыр еҥже мемнан эл чыла чын ышта манын шона. Ойна дене келшыше йолташна-влакын чотышт тӱня мучко геометрический прогрессий семын ешаралтеш. 

Россий ваштареш кучедалме корнын ик шӧрынжӧ - русофобий. Элыштына тыгай экшык ынже лий манын, тудым ончылгоч чактараш чыла вийым пыштышаш улына. Тыгак обществым луштараш таратыше кеч-могай уда шонымашым тӱҥ гычак «руыман». 

Историй дене учебник-влак ала-кӧлан келыштаралтшаш огытыл, чын илышым ончыктышаш улыт. 

Окса нерген

Российын экономикыже пеҥгыде, ончыко каяшат вийже ситышашлык. Идалыкым иктешлымеке, каласаш лиеш: пашадар кокла шотышто 8 процентлан, калыкын парышыже 5 процентлан, пашадымылык 2,9 процентлан ешаралтыт. Кугыжаныш парымын кугытшо 45 миллиард гыч 32 миллиард теҥге марте шагалемын. Вес идалыкыште 1 январь гыч эн изи пашадарын кугытшо (МРОТ) 18 процентлан ешаралтеш. Кӧ элыштына чылажат шалана манын шонен, нунын кумылышт волен: нимо шаланен огыл. 

ЖКХ услугылан тӱлымылан пенсионер-влак деч комиссийым налмаш шотлан ок тол. Пунчал ямде: пенсионер-влак комиссийым тӱлаш огыт тӱҥал (2024 ий 1 июль гыч).  

Элысе рынкыште отечественный бренд-влакын чотышт 30 процентлан ешаралтын. Губернатор-влак региональный брендым вияҥдаш йӧным ыштышаш да тиде йодышым текшырышаш улыт. Тиде мемнан рынкым кумдаҥдаш, тӱрлӧ шӧрынаным ышташ йӧным пуа, оҥайым, поянракым да налшылан келшыше лийшым ышта. 

Искусственный интеллект вияҥме деч кораҥаш ок лий. Тугеже, ме тиде корным такыртышаш да ончылно лийшаш улына. 

У регион-влакым вияҥдаш ме ий еда бюджет гыч триллион теҥге утла оксам ойырена. Эше иза-шольо регион-влак полыш кидым шуялтеныт - чумыржо 150 миллиард теҥге утла оксам пуэныт. Тений у регион-влак федерал бюджетыш 170 миллиард теҥге шийвундым тӱленыт. Тиде нине кундемлаште экономикын тӧрланымыже да саеммыже нерген ойла.