Россий Президентын Посланийже гыч

СВО-н участникше-влаклан полыш  

Специальный военный операцийыште вуйыштым пыштыше воин-влакын ешыштлан, тыгак СВО-н ветеранже-влаклан тӱрлӧ полышым пуымо шотышто сомылым посна кугыжаныш фонд виктараш тӱҥалеш. Тудо «ик окна» принцип дене пашам ышта. Кажне колышо салтакын ешыже, тыгак ветеран-влак шотышто лекше тӱрлӧ йодышым рашемдаш посна социальный пашаеҥым пеҥгыдемдат. Башкирийыште тыгай структурым ышташ тӱҥалме. Икымше рӱдерым февраль покшелне Стерлитамакыште почыныт. Республика Вуйлык Радий Хабиров Уфа, Нефтекамск да Сибай олалаштат рӱдер-влакым почаш шӱден. 

Чыла военнослужащий, доброволец да мобилизоватлыме салтак-влак пелий сайын кок арня (корнылан жапым шотлыде) отпускым налын кертыт. 

Россий стратегический наступательный вооружений нерген договор деч ик жаплан кораҥеш. 

Украинысе конфликт нерген

Тиде проблемым Россий, ваш мутланен, тыныс корно дене ворандарынеже ыле, но шеҥгелне вес сценарийым ямдыленыт улмаш. Кунам уло Донбасс йӱлен, кунам вӱр йоген, кунам Россий тыныс илыш верч сар деч посна кутырен каҥашаш тыршен, нуно еҥ-влакын илышышт дене модыныт. 

Россий ваштареш кучедалмашыште Запад, Шочмо Элыштым аклыдыме да тудым оксалан ужалаш ямде улшо национал-предатель-влаклан эҥертен, обществым лунчырташ да шалаташ тырша. 

Социальный выплата-влак 

Граждан-влаклан газым тугок пуртымо программым мучашдымын шуйымо. 

2024 ий 1 январь гыч эн изи пашадарым 18,5 процентлан кугемдат, районный  коэффициент дене пырля тудо 23 389 теҥге лиеш. 

Социальный налоговый вычет вашталтеш: йоча-влакын тунеммашыштлан идалыклан 50 гыч 110 тӱжем теҥге марте, шкендан тунеммашлан, эмлалтмашлан, эмым налашлан 120 гыч 150 тӱжем теҥге марте кугемдат, тыгеракын, пӧртылтымӧ налогын кугытшо 14,3 да 19,5 тӱжем теҥге марте ешаралтеш. 

Шке кумылын погымо пенсионный накопленийым банкысе вклад семын страховатлат, но кугытшо кок пачаш шукырак - 2,8 миллион теҥге марте - лиеш. 

Образований да наука

Россий кӱшыл образованиян специалист-влакым ямдылыме ончычсо радамыш пӧртылеш. Тунеммаш 4 гыч 6 ий марте шуйна. Профессий ешартыш тунеммашым, посна специализацийым йодеш гын, тунеммашым магистратурышто але ординатурышто шуяш лиеш. Аспирантура профессиональный образованийын посна кӱкшытшӧ семын ойыралтеш. Кызытсе студент-влак тунеммашыштым улшо программа почеш шуят. Тымарте пуымо диплом-влак действительный лийыт. 

Лишыл вич ийыште пашазе профессиян миллион наре специалистым ямдылыман: техникум ден колледжым тунем лекше выпускник-влак пешат кӱлешан улыт.  

Самырык тукым Россий, тудын эртыше илышыже, тӱвыраже, йӱлаже нерген кумданрак палыже манын, гуманитар наука - эн ондак историй, обществознаний, литератур, географий - дене школысо, вузысо тунемме курс-влакым саемдыман. 

Самырык ученый-влаклан илыме верлан финансированийым кугемдат.

Экономика да тудын ончыкылыкшо нерген

Запад Российын экономикыже 25 процентлан лушкыдеммым сӧрыш, но ВВП 2,1 процентлан веле волыш. Тыгодым илыме верым чоҥымо кугыт кызытсе историйыште икымше гана 100 миллион квадрат метрым эртыш, ял озанлык пашаеҥ-влак 150 миллион утла тонн шурным погышт (тушеч шыдаҥже - 100 миллион тонн, тидым рекорд семын аклыман), а паша деч посна улшо-влакын чотышт коронавирус жап деч ончычсо дечат шагалрак - 3,7 процент. 

Владимир Путин бизнесъеҥ-влакым «Шочмо Эл дене пырля лияш, соотечественник-влаклан пашам ышташ, у предприятий-влакым почмо веле огыл, олалаште, поселкылаште, элыште шке йырысе илышым саемдаш» ӱжын. «Бизнесыште тыгай предприниматель-влак мемнан шуко улыт», - каласен тудо. В. Путинын мутшо почеш, отечественный бизнесын ончыкылыкшо лач нунын деч шога. «Сай илышын негызше, ончыкылык лач тыште, Шочмо Элыште, Российыште лийшаш, - палемден Президент. - Йот элысе банклаште шийвундыштым йомдарыше, яхта, полат деч посна кодшо-влакым элысе калык ыш чамане. Еҥ-влак 90-ше ийла годсо приватизацийым, уло эл дене чоҥымо предприятий-влакым тугок гаяк ужалымым, у элитын поянлыкыштым раш шарнат, очыни». 

Президент экономический преступлений-влак шотышто Уголовный Кодексын южо нормыжым угыч ончалаш да тиде йодыш шотышто законодательствым криминализаций деч кораҥдаш шӱден. 

Тений сентябрьыште верысе да региональный кугыжаныш кучемыш, тыгак 2024 ийыште Президентым сайлымаш-влак  чыла демократический, конституционный процедура дене келшышын, закон йодмым пеҥгыдын шуктен эрташ тӱҥалыт.