Эл вуйлыкын пресс-конференцийже эртен

Журналист-влак дене мутланыме годым элын вуйлыкшо коронавирусым сеҥашлан вакцинацийын кӱлешлыкшым, регионлаште калыклан илыме верым чоҥымо пашам сай кӱкшытыштӧ шуктымым, образований да медицинылан ойырымо роскот дене кылдалтше йодышлам тарватен. Тудын мутшо почеш, 2022 ийын бюджетше социально ориентированный - социальный кӱлешлыклан ныл триллион теҥгем ойыраш палемдыме. Владимир Путин элыште пашадымылык ситуацийым саемдыме йодышымат ӧрдыжеш коден огыл. «Пандемий марте пашадыме-влакын чотышт 4,6-4,7 процент лийын гын, кызыт тудо 4,3 процентыш волен», - палемден тудо. Тенийсе шурно лектыш нергенат йодышым лончылымо. Кодшийсе дене таҥастарымаште (133,5 миллион тонн), тений игечылан кӧра лектыш шагалрак (123 миллион тонн) гынат, тиде ситышашлык да экспорт потенциалымат арален кода. 

Пресс-конференцийыште Башкортостан гыч БСТ телеканалын корреспондентше Г. Хайбуллина эл вуйлыклан Уфа олан 2024 ийыште палемдышаш 450 ияш лӱмгечыжлан ямдылалтме сомылышто софинансирований нерген йодышым йоҥгалтарен. Россий Президент Владимир Путин юбилейлан Уфа моторын, достойно ямдылалтшаш манын палемден да ешартыш шийвундым ойырымо шотышто республикысе кугыжаныш кучемын еҥже-влак дене каҥашаш да чыла рашемдаш сӧрен.