Минерал памашыште йӱштылна

Игече сай шога, кӱшыч кече шыргыжеш, кумыл нӧлтшӧ. Корнышто икшыве-влак модыт, воштылыт, шортынат налыт гын, мый шыпак мотор вер-шӧрлам ончен каем. Уло тӱня ший дене леведалтмыла чучеш. Пасу ден пӧрт-влак кечеш туге йылгыжыт - шинчам йымыктарат. А чодыра могай моторын коеш: кож, пӱнчӧ-влак патыр йолыштым укш дене петыреныт, лум дене леведалтше пушеҥге-влак кечыште шӧртньӧ дене велалтмыла койыт. Тораште «малыше» ял-влак койылалтат. Оза-влак шке пӧртыштым йошкар-канде тул дене сылнештареныт, У ий шӱлышым пуртат. Кугу машина-влак оза улмыштым шижтарат, «Изи машина-влак, те тиде корнышто уна гай веле улыда» маныт. Теле пӱртӱсым куанен ончен, кузе миен шумымат шым шиж. Тораште ола тул-влак кояш тӱҥальыч. 

Тюменьыш пытартыш гана 2019 ийыште миенам ыле. Кызыт тудо ятырлан вашталтын: у микрорайон-влак шочыныт, пӧрт-влак кушкын шогалыныт, кугорно ден кӱвар-влакым ыштеныт, уремым кумдаҥденыт. Икманаш, вес олаш логалмыла чучо. 

Родо-шочшо-влак шуко улмылан кӧра кушко малаш пураш манме йодыш ок лек. Таче икте, эрла весе деке кает. Теле каныш пеш кӱчык, садлан чыла вере миен шуаш тыршышна. 

Тюмень ола деч 13 км тораште «Яр» лӱман минерал памаш верланен. Тыгай вӱдеш телымат йӱштылаш лиеш, тудо ок йӱкшӧ. Бассейныш 2500 метр утла келгытан скважина гыч вӱд кӱза. Тудын температуржо 39-46 градус шокшо. 

Тушко миен шумеке, машинам шогалташ вер уке ыле. Уремыште кумло кок градус йӱштӧ гынат, еҥ-влак мӧҥгыштӧ лӱдын огыт шинче улмаш. Вургемым кудашаш шокшо верым ыштыме. Чӱчкыдын еҥ-влак пурен-лектын коштмылан юалгырак чучеш, но ӱдырем-влакын тунар вӱдеш пурымышт шуын, вургемыштым мый дечем ончыч вашталтен чийышт. 

Шокшо вӱдыштӧ бром, бор, йод улыт. Нине вещества-влак улмылан вӱд нарынчалге тӱсан, румбыкан гай коеш, йод улмылан кӧра изиш пушыжат уло. Тудо пагар чер дене черланыше еҥ-влаклан пайдале. Врач-влак тыгай вӱдеш шуко йӱштылаш огыт темле: коло минут йӱштылман, пел шагат наре шӱлалтыман. Вӱдыштӧ вич минут лиймеке шижылтеш - йӱштӧ пылышым чывыштылеш. Вуеш упшым чиен йӱштылна, жап эртымымат ышна шиж. Шокшо вӱдеш лыйык-лойык рӱзалтын, изирак ӱдырем вӱдыштак малаш тӱҥале. Чынжымак шуко пураш ок лий, ноет. Туге гынат шер теммеш йӱштылна. 

Чыла уда энергийым коден, у паша жаплан сай кумылым налын толна.