Волейбол дене модыныт

Телын 24-ше кечыштыже Буймо селаште Шочмо элым аралыше-влакын пайремыштлан пӧлеклыме волейбол турнир лие. Таҥасымаш Буймо поселений вуйлатышын призше лӱмеш эртаралте. Тале, виян марий рвезе-влакым верысе школ вуйлатыше Э. Михайлов ден М. Макаров пырля чумыраш шонен пыштеныт.

Агрыз район марий-влак дек волейболла модаш Ныргынде ял (Одо кундем) рвезе-шамычат тольыч. Чылаже индеш команде погыныш. Икмыняр шагат тыршен кучедалмек, сеҥышым ойырышт. Буймо ял поселений спортсмен-влак эн виян лийыч!

«Тыгай турнирым марий самырык-влак тазалыкыштым шуарышт манын шонен луктынна. Марий-влак коклаште ече дене таҥасымашым эртарат ыле. Ынде волейболын жапше шуын. Волейбол турнирым кажне ий эртараш шонена. Вес ийын эше шукырак команде лиеш, вес кундемла гычат волейболла модаш йӧратыше марий-влак толыт манын ӱшанена. Иктажын полшымыжо шуэш гын, тореш огынал», - каласыш

М. Макаров.

Л. МИХАЙЛОВА.