Йочасад лӱмгечым палемдыш

Йочасадын пашаеҥже, йоча, ава-ача-влакым Буймо ял поселений вуйлатыше В. Шамеев саламлыш. Изи ньога-влак шочмо марий йылмышт дене мурым муралтышт, калык куштымашым ончыктышт, почеламутым каласкалышт. Воспитатель-влак шкештат уна-влаклан концерт номерым пӧлеклышт. Йочасадын пӧлек дене саламлаш толшо ончычсо выпускникше-влакат ыльыч. Буймысо йочасадын историйже гыч икмыняр лаштыкым шергалаш гын, теве мом рашемдаш лиеш.

Буймо ялыште йочасад 1967-ше ий 1 августышто почылтын. Тушко 25 изи ӱдыр-рвезе толын. Йочасадын икымше воспитанникше-влак «Россия» колхозышто тыршыше ава-ача-влакын икшывышт лийыныт. Йӧнештарыме зданийыште у йочасадым почмо сомылыш школ директор С.С. Семенов шагал огыл вийым пыштен. Заведующийлан Л.В. Ишкатова тыршен. Кугурак-влакын мутышт гыч, кажне пӧлемыште ик коҥга лийын. Йочасад пашаеҥ-влак пум шке ямдыленыт, вӱдым таве гыч нумалыныт. Исенбаево селасе пекарньыш киндылан имне дене коштыныт. Шӧрым ферме гыч вӱдвара дене нумалыныт. Моло кочкыш-йӱышым грузовой автомобиль дене Агрыз гыч шупшыктеныт. Йочасадым 25 йочалан йӧнештарыме лийын гынат, тушко икте гыч шым ияш марте 35 йоча коштын. Тунам ялыште икшыве шуко лийын. Ава-ача-влакын йодмышт почеш, 1991-ше ийыште ончычсо школ-интернатын зданийыштыже кокымшо группым почмо. 1992-шо ийыште 50 верлан йӧнештарыме ик пачашан сай, у йочасадым чоҥымо. «Кызыт учрежденийыште кок дошкольный группо уло. 25 икшыве коштеш. Йочасад «Патыр» базовый программа почеш пашам ышта», - каласкала йочасадын вуйлатышыже К. Шамеева.

Йочасадыште чыла икшыве марий улеш. Тидлан кӧра учрежденийыште национально-региональный компонент дене пашам намият. Дошкольный учреждений шке йӱлаж дене виян улеш. А тусо пашаче коллектив эрласе кечыш ӱшанлын онча.

Л. МИХАЙЛОВАН колтымо материал-влак негызеш ямдылыме.