А те кузе иледа? «Поро подписка» - кочажын поро пашажым шуйымаш

Районлаште веле огыл, эл мучко почта отделений-влакым петырен толмо саман лачак тидым ончыкта. 

Изи Соказа ялыште почта пӧлка нигунам лийын огыл. Ончыч тудо пошкудо Емаш ялыште верланен улмаш. Ынде туштат петыреныт. Ялыште почтальонат уке. Садлан газетым налаш шонат гынат, тудлан ожнысо гай возен коштшыжат, намийышыжат уке. 

Россий почтын увертарыме декадыж почеш 11 июнь марте газетлан шулдынрак возалташ лиймым шотыш налын, налаш шонышо-влак коклаште «Чолманым» шараш полшымо кумыл дене Изи Соказа школышто тӱҥалтыш класслаште туныктышо В. Зайцева (снимкыште) «Поро подписка» акцийым шке семынже тарватен. Ялчыже-влак деке почтальон гай шке тарванен, «Чолманлан» возалташ шонышо-влак деч подпискым ыштыме акаш оксам поген да Бирск олаш каен, районысо почтын рӱдӧ пӧлкаштыже квитанцийым возыктен. Газетым Суслово селасе почтыш колташ тӱҥалыт, а тушеч Изи Соказан кевытышкыже сату дене пырля кондат.

Улыт эше тыгай еҥ-влак. Шке ялчышт, йылмышт, шочмо калыкыштлан лекше газет верчат тургыжланат, полшаш, арален кодаш тыршат.

«Мыйын кочам ӱмыржӧ мучко почтальонлан ыштен, - ойла Валентина Владимировна. - Изинек шарнем, кузе тудо, кок кугу сумкам (иктыжым ончыко, весыжым тупыш) ваче гоч кылден сакен, Емаш ялысе почта гыч газет, журнал, серыш-влакым кажне кечын нумал толеш ыле. А телым ече дене тыгак коштын. Почтальон тунам ялыште эн кӱлешан да пагалыме еҥ лийын. Мый, конешне, сумка денак нумалшаш подпискым ыштен ом ситаре гынат, кеч изиш гынат ала полшен кертам манын шонем. Ялчем-влакланат, газетынат ӱмыржым шуяш…»  

Тамле чайым подыл ончаш Памаш ялыш мийыза!

А рушарнян, 7 июньышто, памаш-влак деке корным кучышым. Тушто почтыжат уло, почтальонжат пашам ышта, маныт. Вашлиймаш вер кушто? Конешне, Памаш ялысе клубышто. Кӧ калык дене пашам ышта, кушто илыш шолеш - тушто. Клуб пашаеҥ-влак Л. Сайсанова ден М. Янышева уло кумылын келшышт, увертарымашым мессенджерын ялысе тӱшкаштыже ончылгоч шарышт. Кӧ толеш - тудо толеш. Шкаланемат тидым палаш оҥай ыле. Вашлиймашын амалже - Каныш кече клубым эртараш, подпискым ышташ, чон почын кутыраш… Икманаш, усталык шӱлыш дене ял илышыш ала-мом уым, ойыртемалтшым ешараш.

Ты шотышто шонымашна шукталте. Ужаш шонымо-влак гыч южо вучымо еҥже миен огыл гынат, погынымашна яралан ыш лий. Чолга, кумылзак сескеман тӱшка дене вашлияш, чынак, пеш каньыле ыле. Почтальон миен огыл гынат, кумыл ыш воло. Тудым мый шке вашталтышым. Пуйто тидым шижме семынак, газетлан возалтме квитанций-влакым пеленем налынам ыле. Возалташ кумылан-влак улыт. Тольык илыш пӧрдем оҥайын вашталт толеш. Южо ялыште почтыжат, почтальонжат уке, садлан газетым налаш шонышылан тиде - пеш кугу чарак. А кушто почта пашаеҥ уло - тушто калык дене кыл уке, подпискат ок кай. Мо-гынат тиде каныш кечысе паша корнем деч вара мылам тугерак чучо. Но чайышт пеш тамле ыле, сийыштат тутло! Очыни, тыште памаш вӱдышт тыгай ойыртемалтше таман, садланак ялыштымат тыге лӱмденыт.