Жап писын тарванылаш йодеш

Мишкан район Тынбай ялысе почтым вуйлатыше Вилена Ишмурзина ден Тынбай, У Тынбай ялласе почтальон Людмила Юмагулова тиде йőным кучылташак тыршат. Шочмо йылмына дене лектын шогышо «Чолман» газетлан подпискым ыштыме пашам писештарен колтеныт. Ик арня жапыште марий газетым лудаш йőратыше-влакын чотышт шукемын, кеч почта арняш кум кече веле пашам ышта. Тиде сферыште вашталтыш-влак лийынак шогат: вуйлатышын пашажым пел ставкеш кодымо, ончыч Тынбай, У Тынбай, Измар-Токтар, Кульчубай яллаште кум почтальон лийын гын, кызыт иктым веле коденыт. «Туге гынат чылашкыжат шуман, почта дене кылдалтше  пашам жапыштыже ыштен шуктыман. Подпискым ыштен, газет-влак озашт деке жапыштыже миен шуышт манын тыршыман. Газетлан возалтме жап  мучашлалтмешке, «Чолман», «Келшымаш» марий газет-влаклан возалтше-влакын чотышт эше шукемеш манын ÿшанена,» - каласыш почта вуйлатыше В.С.Ишмурзина.   

Шочмо йылмына дене лектын шогышо газетым марий ешлаште лудын шогышт манын ойгыртышо почта пашаеҥ-влак улыт гын, тушто подпискат  сайын кая, ял калык денат кыл пенгыде.