Лудшылан газет кӱлеш

Иглино селаште илыше Т.А. Шайбакова, марла газетлан кунам да кузе возалташ лийме нерген рашемдаш шонен, БР Печать агентствын Савыктыш пӧртыштыжӧ производствым вуйлатыше А.Н. Кучуклан йыҥгыртен. Алексей Николаевич умылтарен пуэн гына огыл, ӱдырамашын шочмо йылмыж дене лудаш йӧратыме кумылжым кӱкшын аклен, тудлан шке «Чолман» газетлан подпискым ыштен. Татьяна Айбердиновна куанжым шылтен кертын огыл, суапле пашам ыштыше тӧрам мӧҥгыжӧ унала ӱжын. А.Н. Кучук Уфа гыч Иглино селашке миен толашат жапым муын, а пырля войзалтме фотосӱретым (снимкыште), поро шарнымашеш кодшо манын, редакцийыш колтеныт.

Кокымшо пелийлан «Чолман» газетлан умбакыжат возалташ лиеш, подпискым ыштен шуктен огыдал гын, кодшо 5 тылзылан але шагалраклан подпискым ыштен кертыда. «Поро подписка» акцият умбакыже шуйна. Республикыште министр-влак, нунын алмаштышышт да молат шке кӱшеш тыгак газет-влаклан подпискым ыштыме суапле сомылым шуктат. Теве «Чолман» газетымат марий огыл тӧра шке кӱшеш марий ӱдырамашлан пӧлеклен. Тений тыгай акцийыш Уфа оласе «Ош Виче сем» ансамблят ушныш, тидын нерген возенна ыле. Суапле сомылым сай пример семын умбакыже шуйышо моло-влак дечат уверым вучен кодына.