ОНЧЫКЫЛЫК ПАМАШ ВӰДНА ОК ПУЧО

Шушаш пелийлан газетлан возалтме жап мучашке лишемеш. Эрвелмарий-влакын илышышт дене кылдалтше увер-аҥарым пален шогынеда гын, «Чолман» газет тыланда - ӱшанле йолташ. 

Теве Уфа оласе «Ош Виче сем» ансамбльын еҥже-влак, сӧрымӧ мутыштым шуктен, «Чолманлан» уло коллективыштге подпискым ыштеныт! Эсогыл вуйлатышышт Л.С. Фатыхова, татар ӱдырамаш улеш гынат, нуным марла мураш туныкта, марла лудаш кумылаҥда да шкежат марий йылме дене лекше газетлан возалтын! Кугу олаште илат гынат, «Ош Виче сем» ансамбльын чолга еҥже-влак марий калыкын лӱмжым, тӱвыражым тӱрлӧ мероприятийыште нӧлтат, «Чолман» газетымат лудыт, налыт. Нуно тыге шочмо йылмым арален кодашат кугун полшат. Марла газетлан возалтше ура чонан, кумылзак марий-влакын лӱмышт ден фамилийыштымат ончыктыде ок лий: тиде Н.А. Валишина, Г.А. Акбердина, Л.Б. Ишкуатова, И.А. Ивашкина, Е.М. Кочина, З.А. Мадиярова, Е.И. Тимирбаева, Р.Е. Шайбакова, Л.Д. Янсубаева. Нуно молыланат сай примерым ончыктат. Тыгай суапле пашам шуктымо поро койышым моло усталык коллективыштат ылыжтат манын ӱшанен кодына. 

ПӦЛЕК КӦЛАН ЛЕКТЫН? 

«Чолманлан» 2025-ше ийын 2-шо пелыжлан возалтше да квитанцийыштым редакцийыш колтышо лудшо-влак коклаште тиде арнян эртарыме пӧлек модмаште сеҥыше-влакын лӱмыштым увертарена. Шарнаш кодшо пӧлек - суртышто кучылташ кӱлешан арвер-влак - тӱрлӧ районыш каят. М. ГАРЕЕВА (Мишкан район, Нерге) шокшо одеялым, Н. ИЛЬИНА (Краснокам район, Шушнур) утюгым, Э. ИВАНОВА (Бирск район, Куруш) мантоваркым модын налыныт. Саламлена да редакцийыште пӧлеклан вучена! Пеленда документ-влакым (паспорт, ИНН, СНИЛС) налаш ида мондо.