«Чолман» - вучымо уна

Шаран районышто илыше марий-влаклан «Чолман» газет чоныш ӱйым пыштыме гай. Вет республикыштына да вес кундемлаште илыше марий калыкна нерген тушеч шуко уым пален налына. Садланак Шаран марий-влак «Чолманым» йӧратен лудыт. Теве кумдан палыме «Ош пеледыш» ансамбльын участникше-влакат икте кодде подпискым ыштышт. Тиде гына огыл, кушто гына концерт дене лийыт, чыла вере калыклан «Чолман» газетлан подпискым ышташ кӱлмӧ нерген ойлат. Чынжымак вет, ме, марий-влак, тиде газетын ӱмыржӧ кужу лийже манын, подпискым ыштышаш улына. «Чолман» икте-весына коклаште умылымашым, келшымашым шыҥдарен шога, шочмо йылмынам, йӱланам арала.