«Чолман» - мемнан йолташна!

А йолташлан эре полшыман… Кызыт электрон йӧн дене информацийым палыме жап: телефон да компьютер кажне еҥын суртыштыжо уло манаш лиеш. Мутат уке, тиде пеш сай, пеш вашке гына уверым пален налме, икте-весе дене мутланыме, ужмо (скайп, видеойыҥгыртыш, зум) йӧн. Пайрем дене саламлымашат ойыртемалтеш: икте-весылан сӱретан але йӱкан открытка-влакым гына колтат.

А ожно кагазеш печатлыме открытка-влакым колтедылыныт. Кажне пайремлан, шке кид дене возен, мотор деч мотор открытка-влакым почта яшлыкыш намиен пыштымымат шарнеда дыр. Почтальонын сумкажат неле лийын: кажне суртышто шуко тӱрлӧ газет-журналлан подпискым ыштеныт. Тугодсо журнал-влакым шкаф пундаш гыч луктын ончен шинчаш кызытат оҥай чучеш, чонлан келша.

Ойлыманат огыл, кагазеш возымым кидеш кучен але компьютер ден телефон гыч лудын шинчымаш - таҥастараш лийдыме йӧн-влак. Почтальоным вучымашат - эше ик сай тат манаш лиеш. Кызытсе йоча-влаклан, чаманен каласыман, чыла тидым ужаш-шижаш ок логал… Кугеммекышт, тыгай пагытым шарналташ лийже манын, ача-ава-влаклан газетлан подпискым ышташ гын веле? Коча-кова-влакын йылмышт ынже мондалт манын, марий изданий-влакым шукырак налаш тыршыман…

Тӱня мучко шарлыше чер деч ончычак паша верыште тидын нерген мутланенна ыле. Ача-ава-влак келшышт: изи йоча-влак дене мӧҥгыштӧ шочмо йылме дене мутланаш кӱлеш. Ато тыгай мода каен вет: марий ешлаште йочаштым изинекак рушла кутыраш туныктат. Эше кова-коча-влаклан тыгак ышташ шӱдат. Вара воштылаш йӧрышӧ пеле рушла, пеле марла кутырымашым колат. А йоча кок йылмын поянлыкшым мучаш шумеш палыдеак кушкеш. Шочмо йылмым аклаш туныктышо калыкмутат уло вет: шочмо йылме - ава вӱр. Ава - йочажлан кече гай, илышым пӧлекла да ӱмыр мучко илаш вийым пуэн шога. Шочмо йылмат тугак еҥлан вийым пуэн шога, муро, сылнымут корно-влак дене чоным савырен кертеш…

Изи йоча-влак йочасадышкат, школышкат куанен коштыт. Воктенышт могай йылме дене кутырат, нунат тугак вашештат. Тек мӧҥгыштат тыге лиеш…

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Об использовании персональных данных

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».