Подписчикын кечыже лиеш

Тушто «Чолманлан» да моло газетлан возалтын, пӧлекымат модын налаш лиеш. Вашлиймаш лудшын пайремже семын эрта. Полатын икымше, кокымшо пачашыштыже оҥай кидпаша мастер-класс, интерактивный площадке, Нефтекамск печать пӧртын, кинде комбинатын сатум ужалыме выставкышт пашам ышташ тӱҥалыт. Подписчикын пайремыштыже, тӱрлӧ специалист-влак дене вашлийын, юридический полышым налаш, психолог-влак дене тренингым, консультацийым эрташ йӧн лиеш. Полатын кудывечышкыже оласе Тазалык рӱдер гыч автопоезд толаш сӧра. Кумылан-влак туштак тазалыкыштым терген кертыт. Мураш-кушташ йӧратыше-влакымат ӱжына.Тиддеч посна могай пайрем? Газетлан возалташ мийыше-влакым полатын сценыштыже ямле концерт вуча. Гармонь сем почеш тавалташ весела такмакым ямдылен мийыза, «Чолман» нерген такмакым муралтышылан кумылаҥдыше пӧлек лиеш. Газетлан туштак возалтше-влак тыгак пӧлекым модын налын кертыт. Пайрем 12 шагат кечывалым тӱҥалеш.

Йолташлан, пошкудылан увертараш ида мондо!