Эн кугу пӧлекна Корийыш «кудале»

«Чолман» газет редакцийыште шергакан пӧлекым кодшо кушкыжмын, теве-теве газетым печатьыш колтена манме годым, модна. Чылажат шот дене да оҥайракын эртыже манын, шкешотан «комиссийым» чумырышна - Нефтекамск оласе печать пӧртыштӧ тыршыше икмыняр пашаеҥым, лудшо-влакым ӱжна.

Теве погынышо-влак черет дене яшлык гыч иктын-иктын квитанций копий-влакым луктедаш тӱҥальыч: электрочайник, чайгорка, шовычо-влак да молат модылтыч. Южгунамже квитанцийым луктат да ӧрат веле - тиде лудшын лӱмжӧ палымыс: газетнам шукертак налеш, кодшо ганат пӧлеклан тольо, подпискым ышташ редакцийыш пурен ыле… «Велосипедше кӧлан верештеш гын?» манме шонымаш, мутат уке, тылзе наре южышто чоҥештыле. Квитанцийым шӱдырен лукмек, писынрак шаралтен лудын пуышт - тӱҥ пӧлекым Краснокам районысо Корий ялыште илыше Светлана АЛЕКСАНДРОВА модын нале. Ялысе почтальоныштлан йыҥгыртен, ты поро уверым вигак озаж декат намиен шуктышна.

Кас велеш, редакцийыш толын шумекышт, шкеж денат лишкырак палыме лийна. Чынжым гын, Нефтекамск олаштак илен да ятыр ий «Горгазыште» пашам ыштен улмаш. Сулен налме канышыш лекмек, пелашыжын шочмо Корий ялеш «вожаҥыныт». «Чолманым» шукертсек лудеш, но тыгай вучыдымо увер чылт ӧрыктарен да чот куандарен. Пӧлек велосипед дене кудалышташыже пӱрыжӧ! Теат, лудшына-влак, газетланна возалташ жапым да йӧным муын шогыза. Идалык мучко тӱрлӧ уверым лудмо деч посна южгунамже теве тыгай пиалат шыргыжалеш! Чыладамат У ий дене шокшын саламлена! Таза, пиалан лийза!