Почтальон-влак лудшо дек вашкат

Илыш мыняр ончык кая гынат, газет ден журналым, серыш ден посылкым еҥ-влаклан почтальон-влак нумалыт.

Шаран районысо Акпарс почта отделенийым Гульшат Миргасимовна Фахрисламова вуйлата. Почта отделений арня мучко кум кече пашам ышта: шочмын, вӱргечын да кугарнян. Почта пашаеҥ-влак Акпарс, Биктыш, Пекул, Урсай, Усола, Уял, Шалтык ял-влакым обслуживатлат. Штатыште ныл почтальон уло. Лариса Атнагузина, Алена Ташмурзина, Раиса Иркина, Нафиса Фахрисламова газет ден журналым, моло корреспонденцийым ял гыч ялыш, сурт гыч суртыш шалатен коштыт.

Еҥ-влак «Шаранские просторы», Аргументы и факты», «Чолман», «Кугарня», «Пенсионер» газет-влакым шукырак налыт.

Кызыт 2019 ийлан подписке тургым мия, но калык газет ден журнал-влаклан нелынрак возалтеш, палемдышт почтальон-влак. Кодшийсе дене таҥастарымаште, «Чолман» газетым лудшо-влак ешаралтыныт. Почтальон-влак, пашадарышт изи гынат, шке пашаштым сайын шуктен шогат. Подписка тургым мучашлалтмеш, жап эше уло, марий яллаште «Чолман» газетлан возалтше-влак ончычсо деч ятыррак лийыт манын ӱшанен кодына.

Г. АХМЕТШИНА.

Снимкыште: Почтальон-влакын паша кечышт тыге тӱҥалеш.