Кӧлан лекшашым пӧлек шкеак «тогдая»

16-шо номерыште 2018-ше ийын 2-шо пелыжлан «Чолманлан» возалтше лудшына-влак «Башкортостан Республика» Издательский пӧрт деч шергакан пӧлекым модын налыныт манын увертаренна ыле. Эртыше изарнян редакцийыште пиалан лудшына-влак Д. Миннебаева ден А. Байгашевлан «Lenovo» планшетым да «Акку-Чек Актив» глюкометрым кучыктышна. «Пӧлек модмашым эртарыме нерген кушеч палышда?» манын йодмылан Дуся Кузьминична тыге каласыш: «Газет деч посна кузе илаш лиеш? Шоненат ом му. Тӱткынрак лудаш кӱлеш - тунам чыла палаш тӱҥалыда. Эрдене кынелын, БСТ телеканалым чӱктышым, тушто лачак сеҥыше-влакым увертарат ыле. Мыйын лӱмемым увертарен, вӱдышын квитанцийым рӱзалтымыже кызытат шинча ончылнем…» А Анатолий Васюкович «Чолман» газетым лекмыж годсекак лудеш. «Пелашем ондак спиртомер манын умылен, мыйым чыштыренат нале. Глюкометр улмаш. Мемнан гай илалше-влаклан лачак кӱлешан пӧлек», - каласыш тудо.

Тыландат, моло лудшына-влак, газетлан возалтын, пӧлекым «солалташ» тыланена. Але вараш кодын огыдал - 2-шо пелийлан подписка тургым тӱҥалын веле. Туге гынат, шуына эше манын, жапым кужун ида шуйкале. Пакча паша тӱҥалмеш возалтын, идалык пытымеш, газетым кажне арнян налаш тӱҥалыда. «Чолманлан» почто гоч возалтме ак - 396 теҥгеат 96 ыр, редакцийыш толын налше-влаклан - 246 теҥге, Нефтекамскыште илыше-влак верысе «Красное знамя» газетын доставка пӧлкаж гоч возалт кертыт, тыге 300 теҥгеш веле логалеш. Индексше - П2752. 10-20 майыште, Подписка декада жапыште, «Чолманлан» эшеат шулдынрак возалташ лиеш.

А кажне арнян эртарыме пӧлек модмаш умбакыже шуйна. Ты гана пӧлек-влак Нефтекамск оласе лудшо-влаклан лектыныт - пырдыж шагат М. Даниловалан, чайгорка набор Л.Н. Илинбаевалан, заварке чайник З.П. Саликаевалан логалыныт. Газетлан возалтме нерген квитанцийдам вучен кодына.

Снимкыште: 1. Д. Миннебаева 2. А. Байгашев.