-28 °С
Пылан
Все новости
Сеҥымашлан - 80 ий
16 Сӱрем , 13:43
Тек шарнымаш эре ила
Кугу Сеҥымашлан 80 ий темме идалыкыште Акпарсыште шуко паша ышталте. Кугу Ачамланде сарыште лийше землякна-влакым шарныме лӱмеш «Нуно сеҥымаш дене пӧртылыныт» стелым торжественно почна. Тиде поро, суапле пашаш верысе калык, Акпарс ялын моло кундемлаште илыше шочшыжо-влакат ушнышт. Чыла пашам калыкын погымо оксаж дене шуктымо: пашалан кӱлешан пуч-влакым, профильым, чиям, «От благодарных земляков» табличкым, лӱм-влакым возыман гранит плита-влакым да моло арверым налме. Стелым ыштымашке Вадим Исламов, Марат Ибатуллин, Андрей Минлигареев шуко вийым пыштеныт. Марсель Тухватов да Дмитрий Атнабаев шке тракторышт дене ошмам кондаш, бордюр плитам вераҥдаш полшеныт. Самырык рвезе-влак Руслан Идылбаев, Алик Халитов, Евгений Шуматов тротуар плитка-влакым оптымаште тыршеныт. Бикбай Атнакаев тошкалтышлан 10 плиткым пуэн. Чыла пашам Владимир Ахметшин виктарен шоген.
Школ директор Г.Ф. Габдрахманова ойла. Авторын колтымо фото.
Шым мемориал плиташте фронтовик-влакын лӱмыштым возымо. Кугу Ачамланде сарыште лийше-влакын лӱмыштым 91 ияш Алмабика Гафиятовна Кунаккузина рашемдаш полшыш. Тудлан чон гыч лекше тау мутым ойлена!
Тиде шукертсек вучымо проект. Кугу Сеҥымашлан 80 ий темме лӱмеш стелым чоҥаш апрельыште каҥашенна ыле. Ты пашам 1 июльышто мучашлышна. 5 июльышто, Дийын кечын, чапле шарнымаш стелым почна.
Торжественный митингыш Шаран район Советын председательже Р.М. Нуриев, Акпарс сельский поселений вуйлатыше Р.Г. Ягудин, «Движение Первых» мер ушемын верысе пӧлкажым вуйлатыше А.Р. Игдеев, Акпарс сельсоветын депутатше
В.А. Исламов, Акпарс школын директоржо Г.Ф. Габдрахманова, мемнан землячкына, предприниматель
Н.М. Давлетова, туныктышо, тунемше, ветеран, волонтер-влак, ял калык да моло вер гыч уна-влак толыныт. Мутым ойлышо-влак, ял калыклан тауштен, ойыртемалтше-влакым посна палемдышт, Чап грамотым, тауштымо серышым кучыктышт. Саламлыме шомак деч вара шочмо элнам аралыше-влакым шып шоген уштымеке, стела ончык пеледыш аршашым пыштышна.
Йошкар тасмам пӱчмӧ. Ынде кажне еҥ тышке Акпарс ял гыч тулан сарыш кредалаш кайыше да сеҥымаш дене пӧртылшӧ салтак-влакым ушештараш толын кертеш. Памятникым почмашке толшо-влакат, стела воктек намиен, икшывыштлан, уныкаштлан кугезыштын лӱмыштым ончыктеныт. Мероприятий стела ончылно пырля возалтмаш дене мучашлалте.
Новости партнеров