-28 °С
Пылан
Все новости
Сеҥымашлан - 80 ий
25 Июнь , 15:27
Чылажат калыкын вийже дене
Шаран районысо Усолаште Кугу Ачамланде сарыште кредалше, сеҥымашым лишемдаш полшышо сарзе-влаклан мемориал-памятникым почмо лӱмеш 22 июньышто торжественный митинг эртыш. Тушко ял калык гына огыл, Октябрьский, Туймаза олала, Шаран села гычат шукын миеныт ыле. Памятникым ял калык да Усола ден Алманын тӱрлӧ вере илыше шочшышт деч оксам поген ыштеныт. Тудым Усола клубын кудывечыштыже вераҥденыт.
Усолаште Кугу Ачамланде сарыште кредалше-влаклан мемориал-памятник. Авторын фотожо-влак.
Памятникым почаш да йошкар тасмам пӱчкаш район администраций вуйлатышын социальный йодыш шотышто алмаштышыже Ф. Хакимгареевлан, сарын, пашан, Вооруженный вийын, правоохранительный органын да СВО-н ветеранже-влакын районысо Советыштын председательже М. Саитов ден Е. Байрамовлан ӱшанышт.
Е.Б. Байрамов.
Ты проектлан Усола ялын шочшыжо Евгений Батыргареевич Байрамов тӱҥалтышым пыштен. Тудак мемориалым чоҥымо шотышто чыла пашам намиен да тиде сомылым тӱҥалтыш гыч мучаш марте вуйлатен. Акпарс сельский поселений сельсоветым вуйлатыше Рамил Ягудин Евгений Байрамовлан ты проектым илышыш шыҥдараш чот тыршымыжлан, тыгак сельский поселенийыште илыше калыклан, спонсор-влаклан кугу таум каласен.
Проект почеш сарын участникше-влакын лӱмыштым возымо кандаш мемориал плитам йӧнештареныт. Ик велне «Погибли за Родину», вес велне «Вернулись с Победой» манын возымо. Композиций покшелан утарыше сарзын образшым келыштарыме.
Тиде лӱмлӧ событий дене погынышо-влакым шукын саламленыт. Нунын коклаште инициативный группын председательже Гульян Асмаева, Акпарс школын директоржо Гульнара Габдрахманова, паша ветеран Рима Ахметшина. Погынышо-влак Кугу Ачамланде сарыште вуйыштым пыштыше-влакым ик минут шып шоген шарналтеныт. Вара памятник деке венокым, пеледышым пыштеныт. Ф. Хакимгареев, М. Саитов, Р. Ягудин тиде пашам шуктымаште тыршыше-влаклан тауштымо серышым, Минлифагил Саитов Евгений Байрамовлан, Гульян Асмаевалан, Эдуард Шамыкаевлан, Артур Шаймухаметовлан, Валерий Исламбуратовлан «Патриот России» медальым кучыктеныт.
«Таче ме Усола ден Алман ялласе Кугу Ачамланде сарын участникше-влаклан памятникым почына. Тиде нунын курымашлык подвигыштым пагалымаш. Нине яллаште шочын-кушшо да илыше-влак эше ик гана пеҥгыдемденыт: тӱшка вий дене кеч-могай проблемымат решатлаш лиеш», - каласен Е.Б. Байрамов.
Евгений Батыргареевич - шочмо кундемжым йӧратыше, военный темым шымлыше, сарын участникше-влак верч тургыжланыше айдеме. Родо-тукымжо гыч шукынжо Кугу Ачамланде сарыште кредалыныт. Нунын кокла гыч сӧй пасуэш вуйым пыштышыжат, Сеҥымаш дене пӧртылшыжат улыт. Кызыт тудо шочмо ялыштыже у пӧртым чоҥен, тушко Гульнара пелашыж дене илаш пуреныт.
Новости партнеров