-28 °С
Пылан
Все новости
Сеҥымашлан - 80 ий
14 Ага , 12:41
Сеҥымаш кече - кугу пайрем
Сеҥымаш кече - кугу пайрем. Кугу олалаштат, изи яллаштат тудлан кӱлеш семын ямдылалтыт. Акпарс ялыште тыныс илышым пӧлеклыше ветеран-влакым пагален шарныме лӱмеш уэмдыме мемориал воктене торжественный митингым, «Курымашлык полк» акцийым эртарышт. Пайрем мероприятийыш ял калык гына огыл, моло верыште илыше-влакат лӱмын толыныт ыле.
М. Давлетгареевам пайрем дене саламлат. Авторын колтымо фото.
Акпарс сельский поселенийым вуйлатыше Р.Г. Ягудин, школ директор Г.Ф. Габдрахманова, ял калык лӱм дене Р.Д. Ахметшина, Н.М. Давлетова землякыштым пайрем дене шокшын саламлышт.
Чаманен каласыман, тачысе кечылан Акпарсыште мемнан пелен Кугу Ачамланде сарын ик ветеранжат кодын огыл. А теве 95 ияш Меҥылбика Давлетгареева пайремыш уло кумылын толын ыле. Тудо сар годым тылыште тыршен, кызытат пӱсӧ уш-акылан улмыж дене куандара.
Митинг деч вара школышто патриотизм шӱлышан концертым эртарышт. Йочасадыш коштшо ӱдыр-влак да Акпарс школын тунемшыже-влак почеламутым сылнын лудыч, мурым мурышт, моторын кушталтышт. А туныктышо-влак «Журавли» муро дене пайремым мучашлышт.
8 майыште Акпарсыште, Усолаште, Шалтыкыште пионер-влак сарын йочаже-влакым мӧҥгышкышт саламлаш миеныт. 9 майыште Урсай пӧръеҥ-влак, погынен, машина-влакым флаг-влак дене сӧрастарен, автопробегым эртареныт. Фронтовик-влакым шарныме лӱмеш Акпарс, Уял, Урсай, Пекшаул ял-влакын уремлаштышт сигналым пуэн эртеныт.
Новости партнеров