Кок ялыште шарнымаш стелым почыныт

Пайремыште мутым ойлышо-влак, ял калыклан тауштен, поснак ойыртемалтше-влакым палемдышт. Стела пӱтынек ял калыкын вийже да шийвундыж ден ышталтын. Тиде шукерстек вучымо проект, арамлан огыл калык чоҥаш, оксам погымашке рӱж ушнен. СВО гыч Н.Р. Байбатыров вигак 30 тӱжем оксам колтен. Антон Айтиевын ешыже 60 тӱжемым пуэн. Шочмо ялжым йӧратыше Гулбида Шангареева акай витле ий дечат шуко ӧрдыжтӧ ила гынат, 10 000 теҥгем колтен, Лёва Байбатыров, Г. Кунакбаев, В. Байбатыров, А. Андуганов да тулеч молат 5000 дене ушненыт. Стелым почмо деч вара изирак концерт лие. Пайремым муро да куштымаш дене Анач ял гыч «Ош Виче сем» калык ансамбль сӧрастарен. Чыла погынышо-влак «кандырам пунен» куштеныт. Муро ӱстел коклаштат ятыр жап солнен. 

Анач марий-влакын илыме эн кугу яллан шотлалтеш. Ял староста да тудын дене икоян улшо калык Сеҥымашлан 80 ий темме лӱмгечылан пырдыжыште кечыше мемориальный доска олмеш стелым чоҥаш пунчалым луктыныт. Ял калыклан увертарен, кажне сурт гыч шийвундым поген, спонсор-влакын полышышт дене апрель покшелне чоҥымаш пашам тӱҥалыныт. 7 май кечын тӱҥалтыш школ пелен чапле шарнымаш памятникым почыч. Митингыште район вуйлык И.И. Мустафин, Ветеран-влак Советын председательже А.И. Романов да молат лийыныт. Митинг пытымек, «Сударушка» вокальный ансамбль, «Ош Виче сем» калык ансамбль, тӱҥалтыш школын, верысе йочасадын ӱдыр-рвезыже-влак оҥай концертым ончыктеныт.