Шочмо кундемын историйжым, геройжо-влакым палыман

«Реальные дела» программа почеш Акпарс селаште Кугу Ачамланде сар дене кылдалтше мемориал-памятникым уэмдаш оксам ойыреныт. Пуымо окса дене сарыште вуйым пыштыше-влакын лӱмышт дене 16 мемориал плитам, керамогранит плита гыч у стелым шогалтеныт, мемориал ончылно бордюрым да тротуар плитам вашталтеныт. Моло пашалан окса ситен огыл. Мартыште, ял калык дене погынен, вер, проект, материал шотышто мутланышна, тӱҥалме пашам вуйлатен, виктарен шогышым, калык деч оксам погышым палемдышна.

Кызыт калык тӱрлӧ социальный сеть дене кумдан пайдалана. Мемнанат ик мессенджерыште «Акпарс ял» группына уло. Тыге кундем дене кылдалтше ятыр йодышым шукыж годым мӧҥгӧ гыч лекдеак, икте-весе дене вашлийдеак каҥашена. 

Кугу Ачамланде сарыште ӱмыр лугыч лийше земляк-влакым шарныме лӱмеш палемдыме пашалан оксам чаманен огытыл: кӧ ик тӱжем теҥгем пуэн, кӧжӧ вич пачаш шуко пыштен. Кӱчык жапыште 128500 теҥгем погымо. Тыге мемориал йыр профнастил дене у печым печыме, толшо-влаклан шинчаш теҥгылым ыштен шогалтыме, тошкалтышын кок велныже профиль дене кучемым ыштыме. Палемдыме пашам ик арня жапыште ыштен шуктымо, Сеҥымаш кечылан мемориал моторешт шинче. Самырык-влакын патриот шӱлышан улмыштат куандарыш. Нуно Чечняште да СВО-што вуйыштым пыштыше землякышт-влаклан баннерым пижыктышт. Тудо, тыныс илыш верч лӱддымын кредалше, сӧйыштӧ ӱмыр лугыч лийше герой-влакым чапландарен, торашке волгалтеш. Самырык тукым шочмо кундемын историйжым, у геройжо-влакымат палышаш.

Мемориал чылт ямдыжак огыл. Ыштышаш паша эше ятыр. Кугу Отечественный сар гыч пӧртылшӧ да сар деч вара колышо участник-влакым чылаштымат рашемдыме паша жапым йодеш. Вет кеч ик еҥын лӱмжӧ спискыш пурталтде кодеш гынат, ты пашам мучаш марте шуктымылан шотлаш ок лий.

Мемориалым тӱзатымаште ойыртемалтше чолга еҥ-влакымат палемден кодынем. Вадим Исламов, Владимир Ахметшин, Андрей Минлигареев, Александр Шуматов, Марат Ибатуллин, Валентин Ахметшин, Алексей Абхаликов, Расим Имаев, Александр Идылбаев чон йӱлен тыршеныт, кажныже, мо дене кертын, тудын дене полшен. Баннерым меҥгыш самырык рвезе-влак Дмитрий Саитов, Евгений Шуматов, Алик Халитов пижыктеныт.

Кугу сарын тулыштыжо вуйым пыштыше земляк-влак лӱмеш келыштарыме чапле мемориал воктеч эртен кает да калыкын мемнан эрыкна верч кредалше-влак ончылно порысым шижмыже, патриот шӱлышан улмыж шотышто кугешныме кумыл шкеак лектеш.