Музиканче

Музикан семым колышташ чылан йӧратат. Муро семым колыштшо муралтен колта, а куштымо сем шокта гын, йол-влак шкак тавалтат. А Аймет изиж годымак музикан йыр пӧрдын, семже дене кушталтен. Ӱдыр-рвезе-влакын погынымашкышт кошташ тӱҥалмек, музикан дене шоктымым йӧратен колыштын, эре музиканче воктек шинчаш тыршен, семӱзгарын йылмыжым темдыштмыжым куанен ончен. Шкеже эре ик шонымаш дене илен: «Эх! Мыйынат музиканем лийже ыле!»

Ик пазар кечын Аймет Байкибаш селаш йыдал ужалаш миен. Йытыран ыштыме йыдалже-влакым вашке налын пытареныт, эше намияш йодыныт. Вара рвезе пазар мучко коштын савырна, а ик вере кужашрак кучалтеш. Тушто у гына музиканым ужеш да акшым йодеш. Озаже музиканым шке ыштымыж нерген ойла. Качымарий оксажым шотла да семынже йӱкынак пелешта: «Кечын йыдалым ыштем, кум пазар кечын ужалем гын, музикан налаш оксам ситаренат кертам». 

Тыгай планым ыштымек, мӧҥгыжӧ мурен-шӱшкен пӧртылеш. Ыштышаш сомылжо нерген нигӧлан ок ойло. Эрден эрак нийым ямдыла, кастене йыдалым ышта. Тыге кум пазар кечын йыдалым ужален, оксам ситара да гармоньым налын толеш.

Мӧҥгӧ пӧртылмыж годым корнышто кок-кум вере шинчын шоктенат онча. Тудо куштымо семым ончычак шокташ тунемын - Пайгаз туныктен. Эрлашыжым, йӱран кечын, рвезе Пайгаз дек ошкылеш. 

Йолташыже музиканым ӧрын онча. Кушто мумыжым йодеш. Вара коктын кок музикан дене шокташ тӱҥалыт. Каслан коктынат клубыш мияш кутырен келшат. Тыге Аймет музиканже дене ӱдыр-рвезе-влакым куштыкташ тӱҥалеш. Ик ганат ок ялындаре. А мӧҥгӧ мурен пӧртылыныт. 

Илышыште туге шол. Шонен пыштыме поро пашам мучаш марте ыштет гын, чонлан ласка, куштылго лиеш. Аймет ялыште эн пиалан лиеш ыле дыр, но ачаже сар гыч пӧртылын огыл. Аймет тудын пӧртылмыжым кужу жап вучен илен.