+18 °С
Дождь
Сеҥымашлан - 80 ий
12 Марта 2025, 06:43
Акпарсыште - «Сеҥымаш шошо» фестиваль
Пытартыш жапыште патриотизм, элым аралымаш, патриотический воспитаний нерген шуко ойлалтеш. Тидын шотышто пашажат ятыр ышталтеш. Йочасадыште да школлаште кажне арнян военно-патриотический воспитаний шотышто тӱрлӧ мероприятийым эртарат.
Авторын колтымо фото.
5 мартыште Акпарс школыштына «Сеҥымаш шошо» патриотизм шӱлышан фестиваль-конкурс лие. Мастарлык конкурс - кеч-кунамат, кеч-мыняр ияш участниклан кугу событий, вет кажне икшыве шке семынже талантан улеш.
«Сеҥымаш шошо» районысо мастарлык конкурс Кугу Сеҥымашын 80-ше идалыкшылан пӧлеклалтын. Тушто Акпарс да Мешер школлаште тунемше-влак, дошкольный группыш коштшо изи йоча-влак вийыштым тергышт. Йоча-влак мурымаш-куштымаште да почеламутым лудмаште «1-4 класс» да «5-8 класс» тӱшкалаште ӱчашышт. Фестивальыште чылаже 30 утла ӱдыр-рвезе усталыкшым ончыктыш.
Икшыве-влакын выступленийыштым жюри семын Шаран селасе йоча усталык да спорт рӱдерын ешартыш образованийын педагогшо Г.Х. Хуснуллина, райрӱдысӧ тӱвыра полатын режиссержо Р.Х. Давлетова аклышт. Рауфа Харисовна школ коллективын фестивальлан тыршен ямдылалтмыжым палемдыш да йоча-влакын выступленийыштым кӱкшын аклыш, гала-концертыш ӱжаш сӧрыш.
