«Йӱшӧ» пий

Антон павай ден Ална пелашыже кечывал кочкышым ыштен лектычат, кугызай ял вес мучашыште илыше Аптык йолташыж деке тарваныш. Ялын кок мучаштыже илат гынат, школышто тунеммышт годсек кугу йолташ улыт. Школ деч вара трактористланат пырля тунемыч, салтакышкат ик жапыштак коштын тольыч, ешым поген, шочмо ялыште илаш кодыч да, пенсийыш лекмеш, шке колхозышто тыршышт. Антон павайынат, Аптык йолташыжынат икшывышт ешым погеныт, тӱрлӧ вере илат.

Павайын кайыме корныжо кевыт воктеч эрта. Кевытыш пурен, ик кленча сырам (пивым) налын лектеш. Такшым, кок шоҥго йолташ кочывӱд дене таҥ огытыл, нормо дене веле подылалыт. Павайым йолташыже да Аня пелашыже мӧҥгыштӧ порын вашлийыч. Кок кугызай, пырля чайым йӱын, сырам подыльыч. Йылме лывыргыш, Аптык павай шапашлен кодымо сырам лукто. Кутырен шинчыме дене ыштат шиж, теле кече рӱмбалгашат тӱҥале.

Антон павай, чеверласен,

мӧҥгӧ каяш лекте. Сыра шке «пашажым шуктен»: йол йыжыҥым сайынак налын. Ты жапыште Ална кувай пелашыжым вучыш-вучышат, «Чу, каен, ӱжын толшаш» манын, пӧрт гыч лекте. Кувай почеш Олач пийыштат тарваныш.

Ял покшеке шумеке, умбалнырак Антон павай койылалтыш. Лӱҥген ошкылмыжым ужын, Ална кувай мӱндырчын кычкырал колтыш:

- Эй, шоҥго пий! Йӱшӧ пийыш савырнышыч мо?!

Тыгай туманлымаш Олачлан ыш келше, витне. Тудо йыҥысалтен колтышат, шеҥгел чапаже-влакым погалтен, олмешыжак волен шинче. Кувай йоҥылыш вурсымыжым шижын шуктыш. Олачшым ниялткалаш тӱҥале:

- Олачна, вуеш ит нал, вуеш ит нал, йоҥылыш каласышым. Тый йогат, йӱшат отыл. Йӱдшӧ-кечыже сурт-печым аралет, пукшена гын, кочкат, уке гын, кочде-йӱде, шке пашатым шуктет. Тау тылат! Тетла тыгай шомак дене нигӧмат вурсаш ом тӱҥал.

Тиде жаплан Антон паваят воктекышт лишеме:

- Авашт, ит сыре, мыйымат, пийнамат ит вурсо. Адакшым тений Пий идалыкыштак илена вет.

Ална кувайынат шыдыже лушкыш. Лыжган кутырен, мӧҥгӧ велыш ошкыльыч. Нунын воктене Олач пийышт тӧрштыл-модын кудал колтыш.

Р. АЛПАЕВА.

Редакций деч: «Пий идалык» конкурсыш лудшо-влак деч оҥай материал ден фото-влакым вучен кодына.