Книгагудыш унала

Шукерте огыл ме кӱчык жаплан коштмо группысо (ГКП) икшыве-влак дене пырля Чорай селасе книгагудыш мийышна. Мемнам Т.А. Тимиркаева порын вашлие. Таисия Аплекаевна ятыр ий годсек книгагудым вуйлата. Тудо йоча-влаклан савыктыме сӱретан книга ден журнал-влакым ончыктыльо.

Могай книга-влак лийме, кузе нуным ончымо, арун пайдаланыме, кузе книгагудыш книга налаш коштмо нерген каласкалыш. Тыгак Кугу Ачамланде сар пытымылан 75 ий темме да тенийсе Шарнымаш да чап идалык лӱмеш пырдыжеш вераҥдыме стендым ончыктыш да шучко сар жап, калыкын неле илышыж нерген каласкалыш.

Книгагудышто ме В.С. Бай-рамовам вашлийна. Вера Сергеевна ончычсо туныктышо, йоча-влаклан шочмо йылмым туныктен. Яра жапшым тудо эре книгагудышто эртара.

Мучашлан изирак викторинысе йодыш-влаклан вашештышна, туштым туштышна, почеламутлам ойлышна. Таисия Аплекаевна шошо каныш годымат мияш ӱжӧ, вет лач тудо кечылаште Йоча книга пайрем эртаралтеш. Тыге ме, чеверласен, мӧҥгӧ тарванышна.

А. КАМИЛАНОВА, Чорай марий гимназий пеленсе ГКП-н воспитательже. Мишкан район.