Пекарньын пашаж дене палыме лийыныт

Районышто предприятий кажне ийын вияҥеш, ассортиментше ешаралтеш. Тудым вуйлатыше Н.М. Давлетова сатужым кажне ийын Москваште эртарыме «Шӧртньӧ шыже» Всероссийский агровыставкысе конкурсыш намия. Теният кок шӧртньӧ да ик ший медаль дене пӧртылын. Н.М. Давлетова уна-влаклан предприятийын тӱрлӧ конкурслаште сулен налме диплом, кубок да медальже-влакымат кугешнен ончыктен. Тунемше-влак производствын пашам кузе ыштымыжым шымленыт, тӱрлӧ профессийыште тыршыше-влакын пашашт дене палыме лийыныт, киндым, тӱрлӧ тутло кочкышым ямдылыме сомылым шке шинчашт дене ужыныт. 

Экскурсийым пекарньын озаже Надежда Мурзагареевна Давлетова шкеак эртарен, киндым, чак-чакым кӱктымӧ шокшо цехымат ончыктен, булка, когыльо-влакым ыштыме технологический процесс дене палдарен. Тунемше-влак руашым автоматический йӧн дене кузе лугымымат ӧрын эскереныт. Пекарньын пашам ыштыме ойыртемже, пекарь-кондитерын профессиональный корныжо кушеч тӱҥалеш, могай специалист-влак пашам ыштат - тыгай йодыш-влак нерген предприятийын технологшо Т.С. Четайкина каласкален. Тудак йоча-влаклан мелнам кӱэштме мастер-классым эртарен. Экскурсий оҥай лийын, йоча-влаклан пеш келшен. Экскурсий деч вара Надежда Мурзагареевна уна-влакым шокшо кинде да мелна дене сийлен, чайым йӱктен, а школлан мелнам кӱэшташ йӧнештарыме электрический арверым пӧлеклен. Поро кумылжылан, школлан эре полшаш ямде улмыжлан школ директор Г.Ф. Габдрахманова тудым да йоча-влакым пекарньын пашаж дене палдарымыштлан коллектившым уло кумылын тауштен.