Цифровой паспорт кагаз документым ок алмаште

Тидын шотышто Россий Президент Владимир Путин указым луктын. Но, Цифровой вияҥмаш, связь да массовый коммуникаций министерствын палемдымыж почеш, цифровой документ кагаз документым тичмашнек ок алмаште. «Госуслуги» мобильный приложенийым удостоверений, выписка, справка, свидетельство, паспорт олмеш кучылташ лиеш. Тидым правительство радамла. Вес могырым, кагаз документ дене ончычсылак чыла вере пайдаланаш лиеш, приложенийым, кӧн кумылжо уло, тудо гына кучылтеш. 

Тӱрлӧ сервисым, еҥ-влаклан йӧнан лийже манын, цифровойыш савырат, умыландарат эксперт-влак. Тыге документым эре пелен нумалшаш да йомдарем манын лӱдшаш уке, кажне гана паспортысо чыла приватный информацийым (серий, номер, кӧ да кунам пуэн, пелаш да икшыве-влак нерген да молат) ончыкташ ок кӱл. Могай данныйым почшашым шке сайлен налат: кӧ улмым пеҥгыдемдаш ик QR-кодым, ийгот дене палдараш весым темлет. Тидлан технологийымат ямдыленыт: смартфоныш биометрический паспорт гыч фотографийым шындыман, вара QR-код генерироватлалтеш, кӱлеш годым тудым ончыктыман лиеш. 

(«Российский газет» гыч.)