10 у кинозалым почыт

Тыге Россий Федерацийын 49 субъектше гыч кызытсе жапын йодмашыжлан келшен толшо цифровой оборудований дене йӧнештарашлан полышым пуаш 103 кинозалым ойырымо. Спискыш Башкортостан гыч 10 учреждений логалын. Тиде Чишма районысо тӱвыра пӧрт (Чишма поселок), Межгорье оласе кок тӱвыра да каныме рӱдер, Аургаза районысо киновидеосеть (Толбаза села), Абзелил районысо Самырык техник-влакын станцийышт (Аскарово села), Учале (Учале села) ден Мечетле (Большеустьикинское села), Белорецк районласе (Инзер села) райрӱдысӧ тӱвыра пӧрт-влак, Калтаса районысо Краснохолмский ден Калтаса селаласе межпоселенческий тӱвыра ден каныме рӱдер-влак. 2022 ий гыч ик кинозалын переоборудованийжылан 9 миллион теҥгем ойырат. Тачысе кечылан Башкортостаныште 9 районышто веле кызытсе жапын йодмашыжлан келыштарыме кинозал уке. Тиде Архангельский, Аскын, Белокатай, Ермекей, Зианчура, Мишкан, Мияке, Нуриман да Салават район-влак. 2015 ий годсек регионышто чылаже 234 миллион теҥгелан 47 кинозалым почмо. Тушеч 95 миллион теҥгеаш 19 кинозалжым почаш «Тӱвыра» нацпроект йӧным ыштен, увертара БР Тӱвыра министерство.