Селам тӱзаташ кугыжаныш программа полша

«Мемнан кундемыште илыше калыкын 40 процентше - ялысе калык. Садлан селалаште илышым саемдыме йодышым стратегический политический задаче семын аклыман», - палемден тудо. Чумыр ончалмаште, республикыште пытартыш кок ийыште 433 еш илыме вержым саемдаш субсидийым налын, найм договор почеш 100 еш пӧртым чоҥен, селам тӱзатыме шотышто 90 проектым илышыш шыҥдарыме, 14 километр корным шарыме, 33 километр газ пучым, 18 километр утла вӱд пучым шупшмо. 2020-2021 ийлаште селам тӱзатыме кугыжаныш программым финансироватлымаш 3,8 миллиард теҥгеш шуын. 

БР ял озанлык министр И. Фазрахмановын палемдымыж почеш, 2022 ийыште «Комплексное развитие сельских территорий Республики Башкортостан» кугыжаныш программе почеш шым тӱрлӧ йыжыҥ дене тӱрлӧ мероприятийым илышыш шыҥдараш палемдыме. Тыгак чумыржо 2 миллиард 263 миллион теҥгелан (тушеч 1 миллиард 403 миллион теҥгеже - федерал бюджет гыч, 860 миллион теҥгеже - региональный бюджет гыч) 68 объектым чоҥымо пашам тӱҥалме. 

2022 ийым ончалаш гын, илыме верым саемдаш 51 еш субсидийым налын. Тыгак 21 ешлан найм договор почеш пӧртым чоҥаш тӱҥалме. Тыгодымак селам тӱзатыме шотышто 40 проектым илышыш шыҥдараш ямдылат.