Нацпроект почеш Башкортостаныште могай пашам шуктымо?

«Демографий» нацпроектлан кӧра 70 тӱжем утла еш икшыве шочмылан чумыржо 6,5 миллиард теҥгелан тылзе еда тӱлымӧ окса полышым налын. «Здравоохранений» нацпроект почеш кодший регионыш магнит-резонанс, компьютер томографий аппарат-влакым да моло тӱрлӧ профилян 44 единице медицина оборудованийым налыныт, амбулаторный полышым пуышо вич онкологий рӱдерым почыныт. «Образований» нацпроект полшымо дене Стерлитамакыште «Кванториум» технопарк ден йоча-влаклан цифровой образованийым пуышо «IT-куб» рӱдерым, тыгак естественно-научный да технологический направлениян ешартыш 207 «Точка роста» рӱдерым ыштеныт. «Культура» нацпроект почеш 19 тӱвыра учрежденийым саемденыт, яллаште кызытсе жаплан келшыше лу модельный библиотекым почыныт, Караидель районысо Явгильдино селаште тӱвыра пӧртым чоҥеныт. «Жилье и городская среда» нацпроектлан кӧра 2021 ийыште республикыште чылаже 2,9 миллион утла квадрат метр кумдык илыме верым чоҥымо, 146 общественный верым тӱзатыме, 30,6 тӱжем квадрат метр аварийный илыме вер гыч еҥ-влакым сай пачерыш кусарыме. «Безопасные и качественные автодороги» нацпроект почеш 344 километр корным ачалыме, Уфа олаште Ош Виче эҥер гоч у кӱварым йӧнештарыме. Экономический нацпроект полшымо дене Стерлитамак, Октябрьский, Учале, Салават да Белебей олалаште 2021 ийыште «Мой бизнес» рӱдерын офисше-влак пашам ышташ тӱҥалыныт. Изи да кокла предпринимательствын 123 субъектше ыштен лукмо сатуштым йот эллаш ужаленыт. 1164 социально значимый объектыш - ФАП, школ, колледж, ялсовет, пожарный часть да тӱвыра учрежденийлаш - Интернетым пуртеныт. 

2022 ийыште нацпроект-влак полшымо дене республикыште 44 модульный ФАП-ым чоҥаш, 1,6 тӱжем единице кӱкшӧ технологиян медицина оборудованийым налаш, ешартыш 216 «Точка роста» рӱдерым, Стерлитамак, Салават, Октябрьский, Нефтекамск олалаште, Ишимбай, Белорецк районлаште йоча-влаклан цифровой образованийым пуышо шым «IT-куб» рӱдерым, тыгак Салават олаште «Кванториум» технопаркым почаш, 18 тӱвыра учрежденийым уэмдаш, ачалаш палемдыме. Инфраструктур проект-влак шотышто 2,34 миллион квадрат метр кумдык деч шагал огыл илыме верым чоҥаш, 20,5 тӱжем квадрат метр аварийный илыме фонд гыч калыкым йӧнан пачерыш  илаш кусараш, 122 общественный верым тӱзаташ, тыгак изи ола ден исторический поселенийлаште илаш йӧнан средам ыштыме шотышто Всероссийский конкурсышто сеҥышыш лекше населенный пунктлаште (Сибай, Баймак, Белорецк, Благовещенск, Учале, Давлеканово ола, Зилаир да Мелеуз районысо Воскресенское села-влак) тӱзатыме сомылым шукташ палемдыме, увертара БР Правительствын пресс-службыжо.