Кундемыште мыняр калык ила?

Чумыр чот гыч олалаште 2 520 864 еҥ (62,2 процент), яллаште 1 530 141 еҥ (37,8 процент) ила. Тидын годым оласе калыкын чотшо 680 еҥлан ешаралтын гын, миграцийлан кӧра 1160 еҥлан шагалемын. Яллаште калык 11 128 еҥлан шагалемын. Туге гынат Башкортостан Приволжский федерал округышто эн шуко калык илыман кундемлан шотлалтеш.

Республикыште илыше калыкын кокла ийготшо 2010 ийыште 37,7 лийын гын, 2017 ийыште тудо 38,6-ыш шуын. Но калык эркын «шоҥгемеш». 2019 ий 1 январьлан кундемысе 54 район гыч 12-жо 20 тӱжем деч шагал еҥ ила. Самырык-влак вес верлаш илаш куснен каят, а илаш пӧртылыт, мӧҥгешла, шоҥго-влак. Тиде ситуацийыште республикын демографий вияҥмашын комплексный стратегийже, икшыве, поснак икымше, шочашлан кугыжаныш полыш, онкологий дене кылдалтше чер-влакым ончылгоч рашемдымаш, профилактика сомыллан тӱткышым ойырымаш полшен кертыт, иктешлат ученый-влак.

Специалист-влакын шымлымышт почеш, 2030 ийлан пашам ыштен кертше калыкын чотшо 180 тӱжемлан, самырык-влакын 100 тӱжем еҥлан шагалемын, илалше-влакын чотышт 145 тӱжем еҥлан ешаралт кертеш.