Йочалан - модыш, кугыеҥлан - лодыш

Муным… перкалаш келшен

Ончыч ялысе пӧрткӧргы-штӧ койка-влак лийыныт. Шошым койка йымалне чатыр-влак верланеныт. Тушто комбо-влак муным мунченыт да игым луктыныт. 

Ольгат комбым ашнен. Тудыжо верже гыч тарванен - кудывечыш лекмыже шуын. Озавате комбым луктын колтен, шкеже вӱтасе сомылым ышташ пижын. 

Пӧртыштӧ изи Танюша кодын (Аваже тудым ола гыч кокаж деке конден коден.). Изи ӱдыр койка йымаке пурен да муно-влакым совла дене перкален пудыртен.  

Кокаже, пӧртыш пурымеке, ӱдырым йомдарен. Тудыжо койка йымалне шып шинчен. «Таня, тый кушто улат?» - йодын кока. «Мый тыште комбигым кычалам», - шоктен вашмут. Ольга койко йымач ӱдырым луктын, вара чатырым шупшылын, а тушто… чыла муным пудыртымо! 

«Э-эх, молан тыгай осал пашам ыштышыч?» - шорташ ямде кока.

«Тиде ӱдырым молан мый декем кондат гын?» - шке семынже йырымлен каласа Ольга да кугун шӱлалта…

Шинчалташ тӧчен

Нинан комбыжо игым луктын. Игече йӱштылан кӧра ӱдырамаш комбиге-влакым пӧртыштӧ ашнен. Комбыжым вӱташ колтен.  

Пӧртыштӧ Катя лӱман изи ӱдыр лийын. Ава содор гына кевытыш миен толаш погынен. Тиде жапыште Катя кухньо гыч кум черыкан банкым налын да тушко комбиге-влакым оптен. 

Мӧҥгӧ пӧртылмеке, тыгай сӱретым ужын, Нина пешат ӧрын. Комбиге-влакым сайын гына банке гыч луктын да ӱдырым вурсен. Сырымыж дене тудлан кевытыште налме кампетшымат пуэн огыл. 

Рыскалешыже, комбиге-влак эмганен огытыл. 

Изи парикмахер

Анна ден ӱдыржӧ пакчаш пареҥгым ураш лектыныт. Уныкам пӧртеш коденыт, тудыжо курчак дене модын. 

Ик пагыт эртымеке, Анна изи ӱдырым ончал лекташ тарванен. Пӧртыш пурымеке, кова шинчажлан ок ӱшане: уныка, кидыш вашкӱзым налын, пырысын пунжым пӱчкеден шинчен. «Арина, тый мом ыштет?» - йодын кова. «Пырысым тӱредам. Те вет шорыкын межшым тӱредыда, мыят тендан гаяк ышташ шонен пыштышым», - вашештен изи ӱдыр. Йӧра эше, пырысыже тудым удыралын огыл - Аринам колыштын да шып киен.

«Дегустатор»

Ешыште У ий пайремым вучат. Ӱстелыш сийым погат. 

Латкок шагат эрталтымеке, чылан клубыш каяш погынат. Ленат ешыж дене клубыш ошкылеш. Пӧртеш кугезе кова дене вич ияш эргыштым кодат. 

Шоҥгыеҥ, нойымеке, койкыш малаш возеш. Изи йоча пӧрткӧргыштӧ модыш машинаж дене модын. Ик жап гыч тудын кочмыжо шуын. Ӱстелтӧрыш шинчын да пельменьым тамлен, эше, сок манын шонен, кочывӱдым  йӱын. Изи йоча ӱстел воктенак мален колтен. 

Клуб гыч пӧртылмеке, ава ӧрын: кова койкышто мала, а эрге - ӱстелтӧрыштӧ. Йочам кидышкыже налын, а тудын деч кочывӱд пуш шарлен. Лена содор гына ковам кынелтен да тудым вурсаш тӱҥалын. Кова омыюа нимом ок умыло…

Эрдене йоча сайын кынелын, пуйто нимат лийын огыл. Илышыште тыгеат лиеш улмаш.