Марий тӱнян кумдыкшым висаш ок лий

Ставрополь могырыш корным кучаш жап шиждымын толын шуо…

Самолетлан билетым ончылгоч налме, 7 январьыште кечывал деч вара ватем, аэропортыш конден, шокшын öндалын да изишак йокрокланен ужатыш…

Самолетшо мыйым Минеральные Воды ола марте наҥгая, тушто стоянкыште машинамым коденам. 

Самолет гыч волымеке, Ставрополь марте эше 160 уштыш кайыман. Корнышто йокрок ынже лий манын (да бензинат бакышке тугок ок пуро), кызытсе бла-бла-кар сервис дене чÿчкыдын пайдаланем. 

Тиде ганат попутчик-влак деч посна шым код: ик рвезе (Алексей) ончычак верым нале, вара эше Москва гыч толшо мужыр дене Минводы гыч Ставропольыш пырля толаш каҥашен келшышна.

Алексей лÿман пассажирет мылам вотсапыште воза, кузе да кушто вашлияш каҥашена… Ончем, лÿмжö Ольош манын возымо (шкенжым шке тыге лÿмден). Возкалаш тÿҥалмеке пале лие: рвезе Марий Элысе Советский район гыч, Ставропольышто контракт дене службым эрта. СВО-н икымше кечыж гычак тушто кучедалеш, шочмо кундемышкыже отпусклан миен, кызыт угыч службыш вашка. 

Мутланен келшышна, аэропортышто вашлияш да моло мутшым (возаш лийдымым) корнышто шинчаваш мутланаш. Тыгак лие - кок шагат марла талын, чарныде мутланен толна Ставрополь марте. Коклан муралтенат колтышна…

Рвезым частьышкыже пуртен кодымеке, вес кок попутчикым (нуно корнышто мален толыныт) йодмо верышкышт наҥгайышым.

Миен шумеке, машина гыч лектын шогалнат, мутланена. Мыйже пелештышым: Башкирийыште кызыт 20 градус утла йÿштö. «У нас в Удмуртии тоже также» манеш ÿдырамашыже. «Вы удмурты что ли?» - манын йодам. «Нет, я марийка», - манеш…

Калтаса районышто изаже ила тиде ÿдырамашын… сельсовет вуйлатышылан пашам ышта.

Тыгай томаша лийын кайыш. Теве тыге, йолташ-влак, йот Ставрополь олашке, ик машинашке чумырген, кум кундемын (Башкирий, Марий Эл, Удмуртий) марий шочшыжо-влак пырля пöртылна. Марий тÿнян кумдыкшым висаш ок лий, тидым мый  угыч умыленам!