Шонымашышт ыш шукталт

Икече пӧрт оза ден ватыже ӱстелтӧрыш чайым йӱаш шинчыныт. 

- Аваже, - ышталеш пӧръеҥ. - Илен-толын, икшывына-влак, шочмо суртым кудалтен, олашке каят, ме коктын гына кодына. 

- Туге, ӱмыреш воктене кучаш ок лий, - манеш вате.

- Ик эргынам трактористлан тунемаш пуэна. Вара тудо шочмо ялыш колхозыш пашам ышташ толеш, - ешара пӧръеҥ.

- Пеш сай, ӱдырым марлан налмекыже, шешкан лиям, мыланем полышкалыше лиеш, - ойла вате. 

- Йоча-влак школ гыч толмекышт, тиде йодышым рашемдена, - вашешта пӧръеҥ. 

Кас велеш пӧрт оза кевыт гыч ик кленча ош аракам налын толеш да ешым ӱстелтӧрыш поген шында.

Ешге кас кочкышым ышташ шинчыт. Пӧрт оза чаркаш чылалан аракам темен кучыкта. Икшыве-влак, ӧрын, йӱын колтат. 

Ик жап гыч эрге-влакын вуйышкышт саде кочывӱдын куатше кӱзен кая. 

Кугу эрге ачан музиканжым налеш да ямле семым шокталта. Кокымшыжо мурен-мурен кушталтен колта. Изи эрге ӱстелым перен колта да шаулаш тӱҥалеш. Тудым, пыкше гына лыпландарен, кроватьыш малаш пыштат. 

Тыге ача эрге-влакын койышыштым пален налеш да кугу эргыжым воктенже кодаш шонен пышта. 

Жап эртен. Кугу эрге Екатеринбург олаш каен да туштак ешаҥын. Кокымшыжо Нефтекамск олаште пачерым налын. Изи эрге ача-аваж воктене илаш кодын. 

Ачан шонымашыже ыш шукталт. Марий калыкын тыгай мутшо уло: «Шонымо дене огыл, а пуйырымо дене».