Рвезе жап ушеш возеш

Тунам ялыште электротулат, телевизорат лийын огытыл, садлан яра жапыште клубыш кинош коштынна. 

Кызытат Мишканыш мияш логалме годым Ленинский селаш пурымаште шола могырно верланыше изи уремым ончалде ом чыте. Мучаштыже верланыше пӧртыштӧ вате-марий Пойловмыт иленыт. Илалше пӧръеҥ шоферлан тыршен. Ме, эрге-влак, пачерыште шогымо тиде поро ешлан кертмына семын полшенна. Икмыняр гана суртозан солен пыштыме шудыжым поген кондышна. Изиш кучалтына гын, пареҥгыштымат луктын пуэна ыле дыр, но мемнам «Калинниковский» совхозыш кусарышт. Тушто тӱҥ пашана пареҥге лукмаш лие. 

Сентябрь мучаш шуо. Мемнан группысо шым студентна оласе ыльыч. Нуно коклан мӧҥгышт коштыныт. Тылзе мучаште кумыл волышо пӧртылаш тӱҥальыч - олаште умылаш лийдыме пуламыр озаланен: кинде кевытыш кужу черет шоген, лашкам, шӱрашым, сакырым, ложашым нигуштат муаш лийын огыл. Пӧръеҥ-влак уремысе урнылаште тамак окуркым кычалтылыныт. Группыштына мый да Мишкан села гыч руш рвезе тамакым ышна шупш, а моло шым эргына ялысе пӧръеҥ-влак дене пырля шке куштымо тамакым тӱргаш тунем шуыч. 

Мемнан мӱшкыр ток - совхоз пукша. А олаште ончыкыжым илыш тыге кая гын, кузе илыман? Садлан коклаштына ойым пидна да управляющий деч эше ик арнялан пашаш кодаш йодна, вет совхозышто лукшаш пареҥге эше ятыр лийын. Паша семестрнам шуйымылан йывыртышна веле. 

Вара илыш вашталте. Олаш пӧртылмеке, уэш весела тӱсан еҥ-влакым, тамакым тӱргышӧ пӧръеҥ-влакым ужна, кевытлаште шӧрлык пуста шинчен огыл. Тыге илышыште тӱрлыжат лиеда, но, векат, йоча да самырык годсо жап ушеш эн чот лакемалт кодеш.