Все новости
Мыланна возат
4 Кылме 2021, 15:35

Вожылмаш шужышо коден

Ожнырак йолын але имне дене коштыныт. Кызытсе гай, Уфаш але Набережный Челнаш миен, шке пашам ыштен, ныл-вич шагатыште мӧҥгӧ савырнен пӧртылаш лийын огыл.

Вожылмаш шужышо коден
Вожылмаш шужышо коден

Икана сар жапыште авам ден Гулсепа акай могай дыр сомыл дене Груздевка пристаньыш миеныт. Председатель ден бригадир сомылым шуктышо вате-влак шурно сдаватлыме йодышым рашемденыт дыр, кеч-мо гынат мӧҥгӧ пӧртылаш вараш кодыныт. А тунам корнышто шылше ден дезертир-влак озаланеныт, садлан, пычкемышалтмек, кошташ лӱдыкшӧ улмаш.

Чибровка манме руш ял дек лишемме годым чотак пычкемышалтын. Мом ышташ? Лӱдыкшӧ вет. «Айда палымына дек пурен маленат, эрдене пӧртылына», - ойым пуэн авам. Гулсепа акай келшен. 

Тыге коктын палымышт дек пуреныт, мален лекташ йодыныт. Оза-влак кас кочкышым ыштен шинченыт. Сар жапыште шкештат пеле шужен иленыт гынат, нунымат пырля чайым подылаш ӱжыныт. Ойган жапыште, ӱстелыште кешыр чай, коҥгаш тыртыктен кӱктымӧ пареҥге, уржа кинде да шинчал веле гынат, айдеме порыракат лиеш дыр. Но айдемын порылыкшо, кумда чонан улмыжо тиде кочкышымат тутло сийыш савырен. 

Авам вашке гына фуфайкыжым кудашын да, ӱстел коклаш шинчын, кочкышым авызлаш тӱҥалын. А Гулсепа акай «Рахмат, мыйын кочмем огеш шу» малдалын. «Кунам кочкын шуктен, нигушан ышна чарне, орваш шинчын толмо годымат нимом ыш пурыштыс?» - шоналтен авам.

Кочкын лекмек, кӱвареш вакшын пуэныт. 

- Мӱшкырем шужен, кочмем шуэш, - леведыш йымалне шыпак пелештен Гулсепа акай.

- Вара ӱжыч вет, молан шыч шич? - йодын авам.

- Мый вет эше ик гана ӱжыт, шонышым, - вашештен акай, - йӧра, эр марте чытем.

Эрдене эрак кынелын, адак мӧҥгышкыла каеныт. Гулсепа акай пӧртыл шумек веле кочкын кертын. Тыге вожылмаш шужышо коден.

Изображение James Hills с сайта Pixabay 

Автор:Ф. БАЙТУКОВ. Илиш район.
Читайте нас: