Ик села воктене

Икана сентябрь тылзын автобус трук ик села воктене шогале. Водитель, вашке гына лектын, мо азап лиймым тергаш кайыш. Савырнен пурышат, «Автобус пудырген! Эр марте шинчаш логалеш» манын увертарыш. Тиде жапыште ик рвезе, олмыж гыч тарванен, водитель дек лишеме. «Тореш огыдал гын, айста техникыдам уэш ончалына. Можыч, иктаж ойыш шуын кертына. Мый шкеже Уфаште инженерлан тунемам», - мане. 

Автобусым уэш терген лекмек, самырык еҥ илалшырак водительлан тыгайрак ой-каҥашым пуыш: «Теве тиде локтылалтше шапаш ужаш кугу вий-куатан тракторышто уло. А тиде селаште тыгай тракторым кодшо гана тышеч эртыме годым шке шинчам денак ужынам ыле. Мыланна тыште эр марте шинчыман мо?  Ик жап гыч, понарым муын, кок пӧръеҥ «сонарыш» кайыш.

Пиалешышт, кӱлеш шапаш ужашым муын, пел шагат коклаште савырнен тольыч да  пудырген шичше автобуслан «шӱлышым пуртен» кертыч. Шагат утла кудалмек, Шаран селаш миен шуна. Пассажир-влак, шоферлан да вучыдымын кугу азап гыч утарен кертше рвезылан тауштен, автобус гыч лекташ тӱҥальыч. Водитель рвезым шокшын ӧндалын чеверласымыж годым трук йодо: «А тый шкеже кушеч улат?» - «Мичуринск селаш каем». - «А тушко корно могайрак? Пеш тора?» - «Тыглай кугорно. Коло меҥге лиеш». - «Айда, мый тыйым намиен кодем. Садикте унагудышто йокрокланен шинчем. Калык шаланыме деч ончыч кычкырал, можыч, корно йолташ-влак лектыт». Чынак, ныл-вич еҥ тыманмеш куржынат миен шуо…

Изображение Emslichter с сайта Pixabay